atīte bārāṇasiyaṃ brahmadatte rajjaṃ kārente bodhisatto ekasmiṃ nigame vibhavasampannassa brāhmaṇassa kule nibbatti. Rakkhitakumārotissa nāmaṃ akaṃsu. So vayappatto takkasilāyaṃ uggahitasippo katadārapariggaho mātāpitūnaṃ accayena dhanavilokanaṃ katvā saṃviggamānaso mahādānaṃ pavattetvā kāme pahāya himavantap- padese pabbajitvā jhānābhiññaṃ nibbattetvā vanamūlaphalāhāro ekasmiṃ padese vāsaṃ kappesi. Anupubbenassa parivāro mahā ahosi pañca antevāsikasatāni. Athekadivasaṃ te tāpasā bodhisattaṃ upasaṅkamitvā vanditvā ācariya vassārattasamaye himavantato otaritvā loṇambilasevanatthāya janapadacārikaṃ gacchāma evaṃ no sarīrañca thiraṃ bhavissati jaṅghavihāro ca kato bhavissatīti āhaṃsu. Te tenahi tumhe gacchatha ahaṃ idheva vasissāmīti vutte taṃ vanditvā himavantā otaritvā cārikañcaramānā bārāṇasiṃ patvā rājuyyāne vasiṃsu. Tesaṃ mahāsakkārasammāno ahosi. Athekadivasaṃ bārāṇasiyaṃ saṇṭhāgāre sannipatite mahājanakāye maṅgalapañho samuṭṭhāti. Sabbaṃ paccuppannanayeneva veditabbaṃ. Tadā pana manussānaṃ kaṅkhaṃ chinditvā maṅgalapañhaṃ kathetuṃ samatthaṃ apassanto mahājano uyyānaṃ gantvā isigaṇaṃ maṅgalapañhaṃ pucchi. Isayo rājānaṃ āmantetvā mahārāja mayaṃ etaṃ kathetuṃ na sakkhissāma Apica kho amhākaṃ pana ācariyo rakkhitatāpaso nāma mahāpañño himavante vasati so sadevakassa lokassa cittaṃ gahetvā etaṃ maṅgalapañhaṃ kathessatīti vadiṃsu. Rājā bhante himavanto nāma dūre duggamo na sakkhissāma mayaṃ tattha gantuṃ sādhu vata tumheyeva ācariyassa santikaṃ gantvā pañhaṃ pucchitvā uggaṇhitvā punāgantvā amhākaṃ kathethāti āha. Te sādhūti sampaṭicchitvā ācariyassa santikaṃ gantvā vanditvā katapaṭisanthārā ācariyena rañño dhammikabhāve janapadacārike ca pucchite taṃ diṭṭhamaṅgalikādīnaṃ uppattiṃ ādito paṭṭhāya kathetvā rañño yācanāya ca attano pañhāya ñāpanatthaṃ tassa āgatabhāvaṃ pakāsetvā sādhu no bhante maṅgalapañhaṃ pākaṭaṃ katvā kathethāti yāciṃsu. Tato jeṭṭhantevāsiko ācariyaṃ pucchanto paṭhamaṃ gāthamāha