Iminā pariyāyena palitāni visuddhidevānaṃ dūtattā devadūtāti vuccanti. Pabbajjāsamayo mamanti gihibhāvato nikkhamanaṭṭhena pabbajjāti laddhanāmassa samaṇaliṅgagahaṇassa kālo mayhanti dasseti.

So evaṃ vatvā taṃ divasameva rajjaṃ pahāya isipabbajjaṃ pabbajitvā tasmiṃyeva maghaambavane viharanto caturāsītivassasahassāni cattāro brahmavihāre bhāvetvā aparihīnajjhāne ṭhito kālaṃ katvā brahmaloke nibbattitvā puna tato cuto mithilāyameva nemi nāma rājā hutvā ossakkamānaṃ attano vaṃsaṃ ghaṭetvā tattheva ambavane Pabbajitvā brahmavihāre bhāvetvā puna brahmalokūpagova ahosi.

Satthāpi na bhikkhave tathāgato idāneva mahābhinikkhamanaṃ nikkhamanto pubbepi nikkhantoyevāti vatvā idaṃ dhammadesanaṃ āharitvā dassetvā cattāri ariyasaccāni pakāsesi. Saccapariyosāne keci sotāpannā ahesuṃ keci sakadāgāmino keci anāgāmino. Iti bhagavā imāni dve vatthūni kathetvā anusandhiṃ ghaṭetvā jātakaṃ samodhānesi tadā kappako ānando ahosi putto rāhulo maghadevarājā pana ahamevāti.

Maghadevajātakaṃ navamaṃ.