Tattha evanti idaṃ alabbhaneyyaṭṭhānaṃ nāma na patthetabbanti yadi evaṃ jānāsi. Yadaññamanusāsasīti evaṃ jānantova yadi aññaṃ anusāsasīti attho. Pureti atha kasmā ito catumāsamatthake mataṃ puttaṃ ajjāpi anusocasīti vadati.

Iti so antaravīthiyaṃ ṭhitakova bhātika ahaṃ tāva paññāyamānaṃ patthemi tvaṃ pana apaññāyamānassa atthāya socasīti vatvā tassa Dhammaṃ desento puna dve gāthā abhāsi

yaṃ na labbhā manussena amanussena vā puna

jāto me mā marī putto kuto labbhā alabbhiyaṃ.