Tattha viruḷhāti vaḍḍhitānāma natthettha saṃsayoti āsiṃsavasenevamāha. Sallakiyo ca kuṭajāti indasālarukkhā ca kuṭajarukkhā ca. Kuruvindakaravarā bhisasāmāti kuruvindarukkhā ca karavaranāmakāni mahātiṇāni ca bhisāni ca sāmakāni cāti attho. Ete ca sabbe idāni vaḍḍhissantīti paridevantī. Nivāteti pabbatapāde. Pupphitāti mama puttena sākhā bhañjitvā akhādiyamānā kaṇṇikārā ca pupphitā bhavissantīti vuttaṃ hoti. Kocidevāti katthacideva gāme vā nagare vā. Suvaṇṇakāyurāti suvaṇṇābharaṇā rājarājamahāmattā. Bharanti piṇḍenāti ajja mātuposakaṃ nāgarājaṃ rājārahassa bhojanassa suvaḍḍhitena piṇḍena posenti. Yatthāti yasmiṃ nāgarāje rājā nisīditvā. Kavacamabhihessatīti saṅgāmaṃ pavisitvā paccāmittānaṃ kavacaṃ abhihanissati bhindissatīti. Idaṃ vuttaṃ hoti yattha mama putte nisinno rājā vā rājakumāro vā asaṃbhīto hutvā sampattānaṃ kavacaṃ hanissati taṃ me nāgarājānaṃ suvaṇṇābharaṇā ajja piṇḍena bharantīti.

Hatthācariyopi antarāmagge vattamāno ca rañño sāsanaṃ pesesi. Rājā nagaraṃ alaṅkārāpesi. Hatthācariyopi bodhisattaṃ katagandhaparibhaṇḍaṃ alaṅkatapaṭiyattaṃ hatthisālaṃ netvā vicittasāṇiyā parikkhipāpetvā upari vicittāni bandhāpetvā rañño ārocāpesi. Rājā nānaggarasabhojanaṃ ādāya āgantvā bodhisattassa adāsi. So mātaraṃ vinā gocaraṃ na gaṇhissāmīti piṇḍaṃ na gaṇhi. Atha naṃ yācanto rājā tatiyaṃ gāthamāha

gaṇhāhi nāga kabalaṃ mā nāga kisako bhava

bahūni rājakiccāni tāni nāga karissasīti.