Atīte magadharaṭṭhe rājagahanagare eko magadharājā rajjaṃ kāresi. Tadā bodhisatto migayoniyaṃ paṭisandhiṃ gahetvā vuḍḍhiṃ patto migasahassaparivāro araññe vasati. Tassa lakkhaṇo ca kāḷo cāti dve puttā ahesuṃ. So attano mahallakakāle tātā ahaṃ idāni mahallako tumhe idaṃ gaṇaṃ pariharathāti pañca pañca migasatāni ekekaṃ puttaṃ paṭicchāpesi. Tato paṭṭhāya dvepi janā migagaṇaṃ pariharanti. Magadharaṭṭhasmiñca sassasamaye kiṭṭhasambādhe araññe migānaṃ paripantho hoti. Manussā sassakhādakānaṃ migānaṃ māraṇatthāya tattha opātaṃ khaṇanti sūlāni ropenti pāsāṇayantāni sajjanti kūṭapāsādayo pāse oḍenti. Bahū migā vināsaṃ āpajjanti. Bodhisatto kiṭṭhasambādhasamayaṃ ñatvā putte pakkosāpetvā āha tātā ayaṃ kiṭṭhasambādhasamayo bahū migā vināsaṃ pāpuṇanti mayaṃ mahallakā yena tenupāyena ekasmiṃ ṭhāne vītināmessāma tumhe tumhākaṃ migagaṇe gahetvā araññe pabbatapādaṃ pavisitvā Sassānaṃ uddhaṭakāle āgaccheyyāthāti. Te sādhūti pitu vacanaṃ paṭissuṇitvā saparivārā nikkhamiṃsu. Tesaṃ pana gamanāgamanamagge manussā jānanti imasmiṃ kāle migā pabbataṃ ārohanti imasmiṃ kāle orohantīti. Te tattha tattha paṭicchannaṭṭhāne nisinnā bahū mige vijjhitvā mārenti. Kāḷamigopi attano dandhatāya imāya nāma velāya gantabbanti ajānanto migagaṇaṃ ādāya pubbaṇhepi sāyaṇhepi padosepi paccūsepi gāmadvārena gacchati. Manussā tattha tattha pakatiyāva ṭhitā ca nisinnā ca bahū mige vināsaṃ gamenti. Evaṃ so attano dandhatāya bahū mige vināsaṃ pāpetvā appakeheva migehi araññe pāvisi. Lakkhaṇamigo pana paṇḍito byatto upāyakusalo imāya velāya gantabbaṃ imāya velāya na gantabbanti jānāti. So gāmadvārena na gacchati divāpi na gacchati padosepi paccūsepi na gacchati migagaṇaṃ ādāya aḍḍharattikasamayeneva gacchati tasmā ekaṃpi migaṃ avināsetvā araññaṃ pāvisi. Te tattha cattāro māse vasitvā sassesu uddhaṭesu pabbatā otariṃsu. Kāḷo pacchā gacchantopi purimanayeneva avasesamigepi vināsaṃ pāpento ekakova āgami. Lakkhaṇo pana ekaṃ migampi avināsetvā pañcahi migasatehi parivuto mātāpitūnaṃ santikaṃ āgami. Bodhisattopi dve putte āgacchante disvā migiyā saddhiṃ mantento idaṃ gāthaṃ samuṭṭhāpesi.