Tattha mitto mittassāti mahārāja ahaṃ ekassa mitto hutvā tassa mittassa santakaṃ pānīyaṃ iminānāma niyāmena paribhuñji. Tasmāti yasmā puthujjanānāma pāpakammaṃ karonti tasmā ahaṃ mā puna akariṃ. Pāpanti taṃ pāpaṃ ārammaṇaṃ katvā pabbajitomhīti. Chandoti mahārāja iminānāma niyāmena mama paradāraṃ Disvā kāme chando uppajji. Agaṇhīti agaṇhiṃsu. Jānanti tesaṃ corānaṃ ayaṃ kiṃ te hotīti pucchito jānantoyeva na kiñci hotīti aññathā byākāsiṃ. Somayāgeti navachaṇe upaṭṭhite somayāgaṃnāma yakkhabalikammaṃ kariṃsu tasmiṃ upaṭṭhite samanuññāsiṃ. Surāmerayamadhukāti piṭṭhasurādīsu pupphāsavādimerayañca pakkamadhu viya maññamānā. Ye janā paṭhamāsu noti ye no gāme janā paṭhamaṃ evarūpā āsuṃ ahesuṃ. Bahunnaṃ teti te ekadivasaṃ ekasmiṃ chaṇe patte bahunnaṃ anatthāya majjapānaṃ kappayuṃ.

Rājā tesaṃ dhammaṃ sutvā pasannacitto cīvarasāṭake ca bhesajjāni ca datvā paccekabuddhe uyyojesi. Tepissa anumodanaṃ katvā tattheva agamaṃsu. Tato paṭṭhāya rājā vatthukāmesu viratto anapekkho hutvā nānaggarasabhojanaṃ bhuñjitvā itthiyo anālapitvā anoloketvā virattacitto uṭṭhāya sirigabbhaṃ pavisitvā nisinno setabhittiyaṃ kasiṇaparikammaṃ katvā jhānaṃ nibbatteti. So jhānappatto kāme garahanto gāthamāha

dhiratthusu bahukāme duggandhe bahukaṇṭake

yocāhaṃ paṭisevanto nālabhiṃ tādisaṃ sukhanti.