Te pitu matasāsanaṃ sutvāva visaññī ahesuṃ. Punapi nesaṃ kathesi. Puna visaññī ahesuṃ. Evaṃ yāvatatiyaṃ visaññitaṃ patte te amaccā ukkhipitvā udakā nīharitvā thale nisīdāpesuṃ. (laddhassāsesu tesu) sabbe aññamaññaṃ roditvā paridevitvā nisīdiṃsu. Tadā bharatakumāro cintesi mayhaṃ bhātā lakkhaṇakumāro bhaginī ca sitādevī dasarathassa matasāsanaṃ sutvā sokaṃ saṇṭhāretuṃ na sakkonti rāmapaṇḍito pana na socati na paridevati kinnukho tassa asocanakāraṇaṃ pucchissāmi nanti. So taṃ pucchanto dutiyaṃ gāthamāha

Kena rāma pabhāvena socitabbaṃ na socasi

pitaraṃ kālakataṃ sutvā na taṃ pasahate dukkhanti.

Tattha pabhāvenāti ānubhāvena. Na taṃ pasahate dukkhanti evarūpaṃ dukkhaṃ kena kāraṇena taṃ na pīḷeti kiṃ te asocanakāraṇaṃ kathehi tāva noti.