Imesaṃ aṭṭhannaṃ lokadhammānaṃ yenakenaci cittena paññāyanti tassa ca aniccataṃ ñatvā ṭhitassa dhīrassa piyaputtamaraṇādivatthukā mahantāpi sokā hadayaṃ na tāpayantīti. Ekaṃ vā aṭṭhavidhaṃ lokadhammaṃ ñatvā dhīrassa hadayavatthuñca manañca mahantāpi sokā na tāpayantīti evamettha attho daṭṭhabbo. Sohaṃ yasañca bhogañcāti gāthāya tāta bharata andhabālasattānaṃ viya mama rodanaparidevanaṃnāma ananucchavikaṃ ahaṃ pana pitu accayena tassa ṭhāneva ṭhatvā kapaṇādīnaṃ dānārahānaṃ dānaṃ ṭhānantarārahānaṃ ṭhānantaraṃ yasārahānaṃ yasaṃ dassāmi Pitarā me paribhuttanayena issariyaṃ bhuñjissāmi ñātake posessāmi avasesañca anto parijanādhikaṃ janaṃ pālessāmi dhammikasamaṇabrāhmaṇānaṃ dhammikārakkhāvaraṇaguttiṃ karissāmīti etañhi vijānato paṇḍitapurisassa anurūpaṃ kiccanti attho.
Parisā imaṃ rāmapaṇḍitassa aniccatāpakāsanaṃ dhammadesanaṃ sutvā nissokā ahesuṃ. Tato bharatakumāro rāmapaṇḍitaṃ vanditvā bārāṇasirajjaṃ paṭicchathāti āha. Tāta lakkhaṇañca sitadeviñca gahetvā rajjaṃ anusāsathāti. Tumhe pana devāti. Tāta mama pitā dvādasavassaccayena āgantvā rajjaṃ kareyyāsīti maṃ avoca ahaṃ idāneva gacchanto tassa vacanakaronāma nāhomi aññāni pana tīṇi vassāni atikkamitvā āgamissāmīti. Ettakaṃ kālaṃ ko rajjaṃ kāressatīti. Tumhe kārethāti. Na mayaṃ kāressāmāti. Tenahi yāva mamāgamanā imāni pādukā kāressantīti attano tiṇapādukā omuñcitvā adāsi. Tayopi janā pādukā gahetvā rāmapaṇḍitaṃ vanditvā mahājanaparivutā bārāṇasiṃ agamaṃsu. Tīṇi saṃvaccharāni pādukā rajjaṃ kāresuṃ. Amaccā tiṇapādukā rājapallaṅke ṭhapetvā aṭṭaṃ vinicchananti. Sace duvinicchito hoti pādukā aññamaññaṃ paṭihaññanti tāya saññāya puna vinicchananti sammāvinicchitakāle pādukā nissaddāva sannisīdanti. Rāmapaṇḍito tiṇṇaṃ saṃvaccharānaṃ accayena araññā nikkhamitvā Bārāṇasinagaraṃ patvā uyyānaṃ pāvisi. Tassāgatabhāvaṃ ñatvā kumārā amaccaparivutā uyyānaṃ gantvā sitaṃ aggamahesiṃ katvā ubhinnaṃpi abhisekaṃ akaṃsu. Evaṃ abhisekaṃ patto mahāsatto alaṅkatarathe ṭhatvā mahantena parivārena nagaraṃ pavisitvā padakkhiṇaṃ katvā sunandanapāsādavarassa mahātalaṃ abhiruyhi. Tato paṭṭhāya soḷasavassasahassāni dhammena rajjaṃ kāretvā āyuhapariyosāne saggapuraṃ pūresi.