devātidevaṃ naradammasārathiṃ
samantacakkhuṃ satapuññalakkhaṇaṃ
pāṇehi buddhaṃ saraṇaṃ upemīti. Imāya gāthāya saraṇe patiṭṭhahanto avīciparāyano ahosi. Tassa pana pañca upaṭṭhākakulasatāni ahesuṃ. Tānipi tassa pakkhikāni hutvā dasabalaṃ akkositvā avīcimhiyeva nibbattiṃsu. Evaṃ so pañca kulasatāni gaṇhitvā avīcimhi patiṭṭhito. Athekadivasaṃ dhammasabhāyaṃ bhikkhū kathaṃ samuṭṭhāpesuṃ āvuso devadatto pāpo lābhasakkāragiddhatāya sammāsambuddhe aṭṭhānakopaṃ bandhitvā anāgatabhayaṃ anoloketvā pañcahi kulasatehi saddhiṃ avīciparāyano jātoti. Satthā āgantvā kāyanuttha bhikkhave etarahi kathāya sannisinnāti pucchitvā imāyanāmāti vutte na bhikkhave idāneva devadatto lābhasakkāragiddho hutvā anāgatabhayaṃ na olokesi pubbepi anāgatabhayaṃ anoloketvā paccuppannasukhagavesanena saddhiṃ parisāya mahāvināsaṃ pattoti vatvā atītaṃ āhari
atīte bārāṇasiyaṃ brahmadatte rajjaṃ kārente bārāṇasito avidūre kulasahassanivāso mahāvaḍḍhakīgāmo ahosi. Tattha vaḍḍhakī tumhākaṃ mañcaṃ karissāma pīṭhaṃ karissāma gehaṃ karissāmāti vatvā manussānaṃ hatthato bahuiṇaṃ gaṇhitvā kiñci kātuṃ nāsakkhiṃsu. Manussā diṭṭhadiṭṭhe vaḍḍhakī codenti palibuddhanti. Te iṇāyakehi janehi upaddūtā sukhaṃ vasituṃ asakkontā videsaṃ gantvā yattha katthaci vasissāmāti araññaṃ pavisitvā rukkhe chinditvā mahatiṃ nāvaṃ bandhitvā nadiṃ otāretvā āharitvā gāmato gāvutaaḍḍhayojanamatte ṭhāne ṭhapetvā aḍḍharattisamaye gāmaṃ āgantvā puttadāraṃ ādāya nāvaṭṭhānaṃ gantvā taṃ nāvaṃ abhiruyha anukkamena mahāsamuddaṃ pavisitvā vātavasena vicarantā samuddamajjhe ekaṃ dīpakaṃ sampāpuṇiṃsu. Tasmiṃ pana dīpake sayaṃ jātasāliucchukaddaliambajambūpanasatāla nāḷikerādīni vividhāni phalāphalāni atthi. Aññataropi Bhinnanāvo puriso paṭhamataraṃ taṃ dīpakaṃ patvā sālibhattaṃ bhuñjamāno ucchuādīni khādamāno thūlasarīro naggo paruḷhakesamassu tasmiṃ dīpake paṭivasati. Atha tepi vaḍḍhakī cintayiṃsu sace ayaṃ dīpako rakkhasapariggahito bhavissati sabbepi vināsaṃ pāpuṇissāma parigaṇhissāma tāva nanti. Atha sattaṭṭha purisā surā balavanto sannaddhapañcāvudhā hutvā otaritvā dīpakaṃ parigaṇhiṃsu. Tasmiṃ khaṇe so puriso bhuttapātarāso ucchurasaṃ pivitvā sukhappatto rammaṇīye padese rajaṭapaṭṭasadise vālukatale sītāya chāyāya uttānako nipajjitvā jambūdīpavāsino kasantā vapantā evarūpaṃ sukhaṃ na labhanti jambūdīpato mayhaṃ ayameva dīpako varataroti gāyamāno udānaṃ udānesi. Atha satthā bhikkhū āmantetvā bhikkhave so puriso imaṃ udānaṃ udānesīti dassento paṭhamaṃ gāthamāha