Tattha te janāti jambūdīpavāsino janā. Kammaphalūpajīvinoti nānākammānaṃ phalūpajīvino sattā.
Atha te dīpakaṃ parigaṇhamānā purisā tassa gītasaddaṃ sutvā manussasaddo viya suyyati jānissāma nanti saddānusārena gantvā taṃ purisaṃ disvā yakkho bhavissatīti bhītā sare sannahiṃsu. Sopi te disvā Attano vadhabhayena nāhaṃ sāmi yakkho purisomhi jīvitadānaṃ me dethāti yācanto purisānāma tumhādisā naggā na hontīti vutte punappunaṃ yācitvā manussabhāvaṃ ñāpesi. Te taṃ purisaṃ upasaṅkamitvā sammodanīyaṃ kathaṃ katvā tassa tattha āgataniyāmaṃ pucchiṃsu. Sopi tesaṃ sabbaṃ kathetvā tumhe attano puññasampattiyā idhāgatā ayaṃ uttamadīpo na hettha sahatthena kammaṃ katvā jīvanti sayaṃ jātasālinoceva ucchuādīnañcettha anto natthīti anukkaṇṭhā vasathāti āha. Idha pana vasantānaṃ amhākaṃ aññopi paripantho natthīti. Aññaṃ bhayaṃ ettha natthi ayaṃ pana amanussapariggahito amanussā tumhākaṃ uccārapassāvaṃ disvā kujjheyyuṃ tasmā taṃ karontā vālukaṃ viyūhitvā vālukāya paṭicchādeyyātha ettakaṃ idha bhayaṃ aññaṃ natthi niccaṃ appamattā bhaveyyāthāti. Te tattha vāsaṃ upakappesuṃ. Tasmiṃ pana kulasahasse pañcannaṃ pañcannaṃ kulasatānaṃ jeṭṭhakā dve vaḍḍhakī ahesuṃ. Tesu eko bālo ahosi rasagiddho eko paṇḍito rasesu agiddho. Aparabhāge sabbepi te tattha sukhaṃ vasantā thūlasarīrā hutvā cintayiṃsu ciraṃ vata no sūrā ucchurasena merayaṃ katvā pivissāmāti. Te merayaṃ kāretvā pivitvā mattavasena gāyantā naccantā kīḷantā pamattā tattha uccārapassāvaṃ katvā appaṭicchādetvā dīpakaṃ jigucchaṃ paṭikūlaṃ kariṃsu. Devatā ime amhākaṃ kīḷāmaṇḍalaṃ paṭikūlaṃ karontīti Kujjhitvā samuddaṃ uttarāpetvā dīpakasodhanaṃ karissāmāti cintetvā ayaṃ kāḷapakkho ajja amhākaṃ samāgamo ca bhinno itodāni paṇṇarasame divase puṇṇamuposathadivase candassa uggamanavelāya samuddaṃ ubbattetvā sabbepime ghātessāmāti divasaṃ ṭhapayiṃsu. Atha nesaṃ antare eko dhammiko devaputto mā ime mama passantasseva nassantūti anukampāya tesu sāyamāsaṃ bhuñjitvā gharadvāre sukhakathāya nisinnesu sabbābharaṇapaṭimaṇḍito sakaladīpakaṃ ekobhāsaṃ katvā uttarāya disāya ākāse ṭhatvā ambho vaḍḍhakī devatā tumhākaṃ kuddhā imasmiṃ ṭhāne mā vasittha ito aḍḍhamāsaccayena hi devatā samuddaṃ ubbattetvā sabbeva tumhe ghātessanti ito nikkhamitvā palāyathāti dutiyaṃ gāthamāha