Bodhisattassa pana imaṃ gāthaṃ kathentassa rañño setacchattaṃ ārammaṇaṃ katvā odātakasiṇajjhānaṃ udapādi. Rājāpi arogo ahosi. So tuṭṭho sayanā vuṭṭhāya ettakā vejjā tikicchituṃ nāsakkhiṃsu paṇḍitamāṇavo pana attano ñāṇavisayena maṃ nirogaṃ akāsīti tena saddhiṃ sallapanto dasamaṃ gāthamāha

aṭṭha te bhāsitā gāthā sabbā honti sahassiyā

paṭiggaṇha mahābrahme sādhetaṃ tava bhāsitanti.

Tattha aṭṭhāti dutiyagāthaṃ ādiṃ katvā kāmādīnavasaṃyuttā aṭṭha. Sahassiyāti sahassārahā. Paṭiggaṇhāti aṭṭha sahassāni gaṇha. Sādhetaṃ tava bhāsitanti sādhu etaṃ tava bhāsitaṃ vacanaṃ.