Tattha ṭhānānīti kāraṇāni. Pubbeti paṭhamameva akaritvā. Sa pacchā anutappatīti so paṭhamaṃ kattabbāni akārako puggalo idha lokepi paralokepi tappati kilamati. Pacchā vā anutappatītipi pāṭho. Iccāhāti evaṃ rājā janasandho avoca. Iccāsuhātipi pāṭho. Tattha sukāro nipātamattaṃ. Iccāsu āhāti padacchedo. Imāni dasa tapanīyakāraṇāni pakāsetuṃ bodhisattassa dhammakathā hoti.
Tattha pubbeti paṭhameva taruṇakāle parakkamaṃ akatvā asamudānitaṃ asambhūtaṃ dhanaṃ mahallakakāle alabhitvā tappati socati pare ca sukhite disvā sayaṃ dukkhaṃ jīvanto pubbe dhanaṃ pariyesissanti evaṃ pacchānutappati tasmā mahallakakāle sukhaṃ jīvitukāmā daharakāleyeva dhammikāni kasikammādīni katvā dhanaṃ pariyesathāti dasseti. Pure santanti pubbe daharakāle ācariye payirupāsitvā mayā kātuṃ sakyarūpaṃ samānaṃ hatthisippādikaṃ kiñci sippaṃ na sikkhitaṃ. Kicchāti mahallakakāle asippassa dukkhā jīvitavutti neva sakkā tadā sippaṃ sikkhituṃ tasmā mahallakakāle jīvitukāmā taruṇakāleyeva sippāni sikkhathāti dasseti. Kūṭavedīti kūṭajānanako gāmakūṭo vā lokassa anatthakārako vā tulākūṭāni kārako vā kūṭaṭṭakārako vāti attho. Āsinti evarūpo ahaṃ pubbe ahosiṃ. Pisuṇoti pesuññakārako. Piṭṭhimaṃsikoti lañcaṃ gahetvā asāmike sāmike sāmike asāmike karonto paresaṃ piṭṭhimaṃsaṃ khādako. Iti pacchāti evaṃ maraṇamañce nipanno anutappati tasmā sace niraye na vasitukāmattha mā evarūpaṃ pāpakammaṃ karitthāti ovadati. Luddhoti dāruṇo sāhasiko. Anāriyoti na ariyo asaññito dussīlo nīcasamācāro. Nāvajānissanti khantimettānudayavasena nīcavuttiko nāhosiṃ. Sesaṃ purimanayeneva yojetabbaṃ. Anāpadāsūti apadānaṃ āpado pariggahoti attho. Na āpado yāsaṃ atthīti anāpadā. Aññehi akatapariggahāsūti attho. Upaṭṭhiteti paccupaṭṭhite. Na pubbeti Ito pubbe dānaṃ na adadaṃ. Pahusantoti dhanabalenapi kāyabalenapi posituṃ samattho paṭibalo samāno. Ācariyanti ācārasikkhāpanatāya idha pitā ācariyoti adhippeto. Anusatthāranti anusāsakaṃ. Sabbakāmarasāharanti sabbe vatthukāmarase āharitvā positānaṃ. Atimaññissanti tassa ovādaṃ agaṇhanto atikkamitvā maññissaṃ. Na pubbeti ito pubbe dhammikasamaṇabrāhmaṇe gilāne milāte cīvarādīni datvā appaṭijagganena payirupāsissaṃ. Tapoti sucaritatapo. Santoti kāyādīhi dvārehi upasanto sīlavā. Idaṃ vuttaṃ hoti tividhasucaritasaṅkhāto tapo ciṇṇo evarūpo ca santo payirupāsitonāma sādhu sundaro. Na pubbeti mayā daharakāle evarūpo tapo na ciṇṇo iti pacchā jarājiṇṇo maraṇabhayatajjito anutappati socati. Sace tumhe evaṃ na socitukāmā tapokammaṃ karothāti vadati. Yo ca etāni ṭhānānīti yo pana etāni dasakāraṇāni paṭhamameva upāyena paṭipajjati samādāya vattati purisehi kattabbāni dhammikakiccāni karonto so appamādavihāri- puriso pacchā nānutappati somanassappattova hotīti.