Tasmiṃ khaṇe sakkassa bhavanaṃ uṇhākāraṃ dassesi. Sakko āvajjamāno ciñcamāṇavikā tathāgataṃ abhūtena akkosatīti ñatvā idaṃ vatthuṃ sodhessāmīti catūhi devaputtehi saddhiṃ āgami. Devaputtā mūsikapotakā hutvā dārumaṇḍalikassa bandharajjuke ekappahārena chindiṃsu. Pārupanapaṭaṃ vāto ukkhipi. Dārumaṇḍalaṃ patamānaṃ tassā pādapiṭṭhiyaṃ pati. Ubho aggapādā chindiṃsu. Manussāpi kālakaṇṇi sammāsambuddhaṃ akkosasīti sīse khelaṃ pātetvā leḍḍudaṇḍādihatthā jetavanā nīhariṃsu. Athassā tathāgatassa cakkhupathaṃ atikkantakāle mahāpaṭhavī bhijjitvā vivaramadāsi. Avīcito aggijālā uṭṭhahi. Sā kuladattiyaṃ kambalaṃ pārupamānā viya gantvā avīcimhi nibbatti. Aññatitthiyānaṃ lābhasakkāro parihāyi. Dasabalassa bhiyyoso mattāya vaḍḍhi. Punadivase dhammasabhāyaṃ kathaṃ samuṭṭhāpesuṃ āvuso ciṇcamāṇavikā evaṃ uḷāraṃ aggadakkhiṇeyyaṃ sammāsambuddhaṃ abhūtena akkositvā mahāvināsaṃ pattāti. Satthā āgantvā kāya nuttha bhikkhave etarahi kathāya sannisinnāti pucchitvā imāya nāmāti vutte na bhikkhave idāneva pubbepi esā maṃ abhūtena akkositvā vināsaṃ pattāyevāti vatvā atītaṃ āhari
atīte bārāṇasiyaṃ brahmadatte rajjaṃ kārente bodhisatto tassa aggamahesiyā kucchismiṃ nibbatti. Phullapadumasarikkhamukhattā panassa padumakumārotveva nāmaṃ kariṃsu. So vayappatto sabbasippāni Uggaṇhitvā āgami. Athassa mātā kālamakāsi. Rājā aññaṃ aggamahesiṃ katvā puttassa uparajjaṃ adāsi. Aparabhāge rājā paccantaṃ kupitaṃ vūpasametuṃ gacchanto aggamahesiṃ bhadde idheva vasa ahaṃ paccantaṃ vūpasametuṃ gacchāmīti vatvā nāhaṃ idheva vasissāmi ahaṃpi gamissāmīti vutte yuddhabhūmiyaṃ ādīnavaṃ pakāsetvā yāva mamāgamanā anukkaṇṭhamanā vasa ahaṃ padumakumāraṃ yathā tava kattabbakiccesu appamatto hoti evaṃ āṇāpetvā gamissāmīti vatvā tathā katvā gantvā paccāmitte palāpetvā janapadaṃ santappetvā paccāgantvā bahinagare khandhāvāraṃ nivāsesi. Bodhisattopi pitu āgatabhāvaṃ ñatvā nagaraṃ alaṅkārāpetvā rājagehaṃ paṭijaggāpento ekakova tassā santikaṃ agamāsi. Sā tassa rūpasampattiṃ disvā paṭibaddhacittā ahosi. Bodhisatto taṃ vanditvā amma amhākaṃ kiṃ kattabbanti pucchi. Atha maṃ ammāti mā vadesīti uṭṭhāya hatthe gahetvā sayanaṃ abhirūhāti āha. Kiṃkāraṇāti. Yāva rājā na āgacchati tāva ubhopi kilesaratiyā ramissāmāti āha. Amma tvaṃ mama mātā ca sassāmikā ca mayā sapariggaho mātugāmo nāma kilesavasena indriyāni bhinditvā na olokitapubbo kathaṃ tayā saddhiṃ evarūpaṃ kiliṭṭhakammaṃ karissāmīti. Sā dve tayo vāre kathetvā tasmiṃ anicchamāne mama vacanaṃ na karosīti āha. Amma na karomīti. Tenahi evaṃ rañño kathetvā sīsaṃ te chindāpessāmīti. Mahāsatto tava ruciyā karohīti taṃ Lajjāpetvā pakkāmi. Sā bhītatasitā cintesi sacāyaṃ paṭhamataraṃ pitu ārocessati jīvitaṃ me natthi ahameva puretaraṃ kathessāmīti bhattaṃ abhuñjitvā kiliṭṭhavatthaṃ nivāsetvā sarīre nakharājiyo dassetvā kuhiṃ devīti raññā pucchitakāle gilānāti katheyyāthāti paricārikānaṃ saññaṃ datvā gilānālayaṃ katvā nipajji. Rājāpi nagaraṃ padakkhiṇaṃ katvā nivesanaṃ āruyha taṃ apassanto kuhiṃ devīti pucchitvā gilānāti sutvā sirigabbhaṃ pavisitvā kiṃ te devi aphāsukanti pucchi. Sā tassa vacanaṃ asuṇantī viya hutvā dve tayo vāre pucchitāpi tuṇhī ahosi. Devi kiṃ maṃ na kathesīti. Sassāmikaitthiyo nāma mādisā na hontīti vatvā kenaci viheṭhitāsi sīghaṃ me kathehi sīsamassa chindissāmīti vutte kaṃ tvaṃ mahārāja nagare ṭhapetvā gatosīti. Puttaṃ padumakumāranti. So mayhaṃ vasanaṭṭhānaṃ āgantvā tāta mā evaṃ karohi ahaṃ tava mātāti vuccamānopi ṭhapetvā maṃ añño rājā nāma natthi ahaṃ taṃ gehe karitvā kilesaratiyā ramissāmīti maṃ kesesu gahetvā aparāparaṃ luñcitvā attano vacanaṃ akarontaṃ vadhitvā koṭetvā gatoti āha. Rājā anupaparikkhitvāva āsīviso viya kuddho purise āṇāpesi gacchatha padumakumāraṃ bandhitvā ānethāti. Te nagaraṃ avattharantā viya gehaṃ gantvā taṃ bandhitvā paharitvā pacchābāhuṃ daḷhabandhanaṃ bandhitvā rattakaṇṇaveramālaṃ gīvāyaṃ paṭimuñcitvā vajjhabhāvaṃ katvā paharantā ānayiṃsu. So deviyā idaṃ kammanti ñatvā bho purisā nāhaṃ rañño Dosakārako niraparādhovāhamasmīti vilapanto āgacchati. Sakalanagaraṃ saṃkhubhitvā rājā kira mātugāmassa vacanaṃ gahetvā mahāpadumakumāraṃ ghātāpetīti sannipatitvā kumārassa pādamūle nipatitvāva na te idaṃ sāmi anucchavikanti mahāsaddena paridevi. Atha naṃ netvā te rājapurisā rañño dassesuṃ. Rājā disvāva cittaṃ niggaṇhituṃ asakkonto ayaṃ arājāva rājalīlaṃ karoti mama putto hutvā aggamahesiyā aparajjhati gacchatha naṃ corapapāte pātetvā vināsaṃ pāpethāti āha. Mahāsatto na mayhaṃ tāta evarūpo aparādho atthi mātugāmassa kathaṃ gahetvā mā maṃ nāsehīti pitaraṃ yāci. So tassa kathaṃ na gaṇhi. Tato soḷasasahassā antepurikā tāta mahāpadumakumāra te attano ananucchavikaṃ idaṃ laddhanti mahāviravaṃ viraviṃsu. Sabbe khattiyamahāsālādayopi amaccaparijanāpi deva kumāro sīlācāraguṇasampanno vaṃsānurakkhito rajjadāyādo mā naṃ mātugāmassa vacanaṃ gahetvā anupaparikkhitvā vināsehi raññā nāma nisammakārinā bhavitabbanti vatvā satta gāthā abhāsiṃsu