Evaṃ vutte soḷasasahassāsu rājitthīsu ekāpi sakabhāvena saṇṭhāretuṃ nāsakkhi. Sakalanagaravāsino bāhā paggayha kanditvā kese vikiriyamānā vilapiṃsu. Rājā ime imassa papātakhipanaṃ paṭibāheyyunti saparivāro gantvā mahājanassa paridevantasseva naṃ uddhapādaṃ adhosiraṃ gāhāpetvā papāte khipāpesi. Athassa mettābhāvanānubhāvena pabbate adhivatthā devatā mā bhāyi mahāpadumāti taṃ samassāsetvā ubhohi hatthehi gahetvā hadaye ṭhapetvā dibbasamphassaṃ pharāpetvā otaritvā pabbatapādapatiṭṭhita- nāgabhavane nāgarājassa phaṇagabbhe ṭhapesi. Nāgarājā bodhisattaṃ nāgabhavanaṃ netvā attano yasaṃ majjhe bhinditvā adāsi. So tattha ekasaṃvaccharaṃ vasitvā manussapathaṃ gamissāmīti vatvā kataraṃ ṭhānanti vutte himavantaṃ gantvā pabbajissāmīti āha. Nāgarājā sādhūti taṃ gahetvā manussapathe patiṭṭhapetvā pabbajitaparikkhāre datvā sakaṭṭhānameva gato. Sopi himavantaṃ pavisitvā isipabbajjaṃ pabbajitvā jhānābhiññā nibbattetvā vanamūlaphalāhāro tattha paṭivasati. Atheko bārāṇasivāsī vanacarako taṃ ṭhānaṃ patto mahāsattaṃ sañjānitvā nanu tvaṃ deva mahāpadumakumāroti vatvā āma sammāti vutte taṃ vanditvā katipāhaṃ tattha vasitvā Bārāṇasiṃ gantvā rañño ārocesi deva putto te himavantaṃppadese isipabbajjaṃ pabbajitvā paṇṇasālāyaṃ vasati ahaṃ tassa santike vasitvā āgatoti. Supaccakkhato te diṭṭhoti. Āma devāti. Rājā mahābalakāyaparivuto tattha gantvā vanapariyante khandhāvāraṃ bandhitvā amaccaparivuto paṇṇasālaṃ gantvā kāñcanarūpakaṃ viya pajjalantaṃ siriyā paṇṇasāladvāre nisinnaṃ mahāsattaṃ disvā vanditvā ekamantaṃ nisīdi. Amaccā vanditvā paṭisanthāraṃ katvā nisīdiṃsu. Bodhisatto rājānaṃ phalena paṭipucchitvā paṭisanthāraṃ akāsi. Atha naṃ rājā tāta mayā tvaṃ gambhīre papāte khipāpito kathaṃ sajīvitosīti pucchanto navamaṃ gāthamāha

anekatāle narake gambhīre ca suduttare

pātito giriduggasmiṃ kena tvaṃ tattha nāmarīti.