idheva haṃsa nipata piyaṃ me tava dassanaṃ
issarosi anuppatto yaṃ idhatthi pavedayāti.
Tattha idhāti kāñcanapīṭhaṃ sandhāyāha. Nipatāti nisīda. Issarosīti tvaṃ imassa ṭhānassa issaro sāmi hutvā āgatosīti vadati. Yaṃ idhatthīti yaṃ imasmiṃ nivesane atthi taṃ aparisaṅkanto amhākaṃ kathehi.
Mahāsatto kāñcanapīṭhe nisīdi. Rājā satapākasahassapākehi telehi tassa pakkhantarāni makkhetvā kāñcanataṭṭake madhulāje ca sakkharodakañca dāpetvā madhurapaṭisanthāraṃ katvā samma ekakova āgatosi kahaṃ gamitthāti pucchi. So taṃ pavuttiṃ vitthārena kathesi. Atha naṃ rājā āha samma mamapi suriyena saddhiṃ javitavegaṃ dassehīti. Mahārāja na sakkā taṃ vegaṃ dassetunti. Tenahi me sarikkhakamattaṃ dassehīti. Sādhu mahārāja sarikkhakamattaṃ dassessāmi akkhaṇavedhidhanuggahe sannipātehīti. Rājā sannipātesi. Mahāsatto sabbaseṭṭhake cattāro dhanuggahe gahetvā rājanivesanā oruyha rājaṅgaṇe silāthambhaṃ nikkhaṇāpetvā attano givāyaṃ kaṇḍaṃ bandhāpetvā silāthambhamatthake nisīditvā cattāro pana dhanuggahe silāthambhaṃ nissāya catuddisābhimukhe Ṭhapāpetvā mahārāja ime cattāro janā ekappahārena catuddisābhimukhāva cattāri kaṇḍāni khipantu tānāhaṃ paṭhaviṃ appattāneva āharitvā etesaṃ pādamūle pātessāmi mama kaṇḍagahaṇatthāya gatabhāvaṃ kaṇḍasaddasaññāya jāneyyāsi ahaṃ pana na paññāyissāmīti vatvā tehi ekappahāreneva khittakaṇḍāni jiyāto muttamattāni āharitvā tesaṃ pādamūle pātetvā silāthambhamatthake nisinnameva attānaṃ dassetvā diṭṭho te mahārāja mayhaṃ vegoti vatvā mahārāja ayaṃ vego mayhaṃ neva uttamo na majjhimo paritto lāmakavego esa evaṃ siyā mahārāja amhākaṃ vegoti āha. Atha naṃ rājā pucchi samma atthi pana tumhākaṃ vegato añño sīghataro vegoti. Āma mahārāja amhākaṃ uttamavegatopi sataguṇena sahassaguṇena satasahassaguṇena imesaṃ sattānaṃ āyusaṃkhārā sīghatarā khīyanti bhijjanti khayaṃ gacchantīti khaṇikanirodhavasena arūpadhammānaṃ bhedaṃ dasseti. Rājā mahāsattassa kathaṃ sutvā maraṇabhayabhīto satiṃ paccupaṭṭhapetuṃ asakkonto bhūmiyaṃ patati. Mahājano utrāsasampatto ahosi. Rañño mukhaṃ udakena siñcitvā satiṃ paṭilabhāpesuṃ. Atha naṃ mahāsatto mahārāja mā bhāyi maraṇasatiṃ bhāvehi dhammaṃ carāhi dānādīni puññāni karohi appamatto hohi devāti ovadi. Atha rājā samīpaṃ tumhādisena ñāṇasampannena ācariyena vinā vasituṃ na sakkhissāma citatkūṭapabbataṃ agantvā mayhaṃ dhammaṃ desento ovādācariyo hutvā idheva vasāhīti yācanto dve Gāthā abhāsi