atīte kāliṅgaraṭṭhe dantapuranagare kāliṅgo nāma rājā rajjaṃ kāresi. Tassa mahākāliṅgo cullakāliṅgoti dve puttā ahesuṃ. Tesu nemittakā jeṭṭhaputtaṃ pitu accayena rajjaṃ kāressatīti byākariṃsu. Kaniṭṭhaṃ pana ayaṃ isipabbajjaṃ pabbajitvā bhikkhāya carissati putto panassa cakkavatti bhavissatīti byākariṃsu. Aparabhāge jeṭṭhaputto pitu accayena rājā ahosi. Kaniṭṭho pana uparājā. So putto kira me cakkavatti bhavissatīti puttaṃ nissāya mānamakāsi. Rājā asahanto cullakāliṅgaṃ gaṇhāti ekaṃ atthacarakaṃ āṇāpesi. So gantvā kumāra rājā taṃ gaṇhāpetukāmo tava jīvitaṃ rakkhāti āha. So attano lañcamuddikañca sukhumakambalañca khaggañcāti imāni tīṇi atthacarakassa amaccassa dassetvā imāya saññāya mama puttassa rajjaṃ dadeyyāthāti vatvā araññaṃ pavisitvā ramaṇīye bhūmibhāge assamaṃ katvā isipabbajjaṃ pabbajitvā nadītīre vāsaṃ kappesi. Maddaraṭṭhepi sāgalanagare maddarañño aggamahesī dhītaraṃ vijāyi. Taṃ nemittakā ayaṃ bhikkhaṃ caritvā jīvissati putto panassā cakkavatti bhavissatīti byākariṃsu. Jambūdīparājāno taṃ pavuttiṃ sutvā ekappahāreneva āgantvā nagaraṃ rundhiṃsu. Maddarājā cintesi sacāhaṃ imaṃ ekassa dassāmi sesarājāno kujjhissanti mama dhītaraṃ rakkhissāmīti dhītarañca bhariyañca gahetvā aññātakavesena palāyitvā araññaṃ pavisitvā kāliṅgakumārassa assamapadato uparibhāge assamaṃ katvā pabbajitvā uñchācariyāya jīvitaṃ kappento tattha paṭivasati. Mātāpitaro dhītaraṃ rakkhissāmāti taṃ assamapade katvā phalāphalatthāya gacchanti. Sā tesaṃ gatakāle nānāpupphāni gahetvā pupphacumbitakaṃ katvā gaṅgātīre ṭhapesi. Sopāṇapantī viya jāto. Eko supupphito ambarukkho atthi. Taṃ abhiruyhitvā kīḷitvā pupphacumbitakaṃ khipati. Taṃ ekadivasaṃ gaṅgāyaṃ nhāyantassa kāliṅgakumārassa sīse laggi. So oloketvā idaṃ ekāya itthiyā kataṃ no ca kho mahallikāya kataṃ taruṇakumārikāya kataṃ vimaṃsissāmi tāva nanti kilesavasena uparigaṅgaṃ gantvā tassā ambarukkhe nisīditvā madhurena sarena gāyantiyā saddaṃ sutvā rukkhamūlaṃ gantvā taṃ disvā bhadde kānāma tvanti āha. Mānusīhamasmi sāmīti. Tenahi otarāhīti. Na sakkā sāmi ahaṃ khattiyāti. Bhadde ahaṃ khattiyova otarāhīti. Sāmi na vacanamatteneva khattiyo hoti yadi khattiyo khattiyamāyaṃ kathethāti. Te ubhopi aññamaññaṃ khattiyamāyaṃ kathayiṃsu. Tesaṃ piyasaṃvāsavasena vasantānaṃ rājadhītā gabbhaṃ Labhitvā dasamāsaccayena dhaññapuññalakkhaṇasampannaṃ puttaṃ vijāyi. Kāliṅgotissa nāmaṃ akaṃsu. So vayappatto pitu ceva ayyakassa ca santike sabbasippānaṃ nipphattiṃ pāpuṇi. Athassa pitā nakkhattayogavasena bhātu matabhāvaṃ ñatvā tāta mā tvaṃ araññe vasa peteyyo mahākāliṅgo kālakato tvaṃ dantapuraṃ gantvā kulasantakaṃ rajjaṃ gaṇhāhīti vatvā attanā ānītaṃ muddikañca kambalañca khaggañca datvā tāta dantapuranagare asukavīthiyaṃ amhākaṃ atthacarako amacco atthi tassa gehe sayanamajjhe otaritvā imāni tīṇi ratanāni tassa dassetvā mama puttabhāvaṃ ācikkha so taṃ rajje patiṭṭhapessatīti uyyojesi. So mātāpitaro ca ayyake ca vanditvā puññamahiddhiyā ākāsena āgantvā amaccassa sayanapiṭṭheyeva otaritvā kosi tvanti puṭṭho cullakāliṅgassa puttomhīti ācikkhitvā tāni ratanāni dassesi. Amacco rājaparisāya ārocesi. Amaccā nagaraṃ alaṅkārāpetvā tassa chattaṃ ussāpayiṃsu. Athassa kāliṅgassa bhāradvājonāma purohito tassa cakkavattivattāni ācikkhi. So taṃ vattaṃ pūresi. Athassa paṇṇarasuposathadivase cakkadahato cakkaratanaṃ uposathakulato hatthiratanaṃ valāhakaassarājakulato assaratanaṃ vepullapabbatato maṇiratanaṃ āgami itthīgahapatiparināyakaratanāni pātubhaviṃsu. So cakkavāḷagabbhe rajjaṃ gaṇhitvā ekadivasaṃ chattiṃsayojanāya senāya parivuto sabbasetaṃ kelāsakūṭapaṭibhāgaṃ hatthiṃ abhiruyha mahantena sirivilāsena Mātāpitūnaṃ santikaṃ pāyāsi. Athassa sabbabuddhānaṃ jayamaṇḍalassa paṭhavinābhibhūtassa mahābodhimaṇḍalassa uparibhāgena nāgo gantuṃ nāsakkhi. Rājā punappunaṃ codesi. So nāsakkhiyeva.