Atīte bārāṇasiyaṃ brahmadatte rajjaṃ kārente tassa purohito piṅgalo nikkhantadāḍho ahosi. Tassa brāhmaṇī aññena brāhmaṇena saddhiṃ aticari. Sopi tādisova. Purohito brāhmaṇiṃ punappunaṃ vārentopi vāretuṃ asakkonto cintesi imaṃ mama veriṃ sahatthā māretuṃ na sakkā upāyena naṃ māressāmīti. So rājānaṃ upasaṅkamitvā āha mahārāja tava nagaraṃ sakalajambūdīpe agganagaraṃ tvaṃ aggarājā evaṃ aggaraññonāma tava dakkhiṇadvāraṃ duyuttaṃ avamaṅgalanti. Ācariya idāni kiṃ kātabbanti. Maṅgalaṃ yojetabbanti. Kiṃ laddhuṃ vaṭṭatīti. Purāṇadvāraṃ hāretvā maṅgalayuttāni dārūni gahetvā nagarapariggāhakānaṃ bhūtānaṃ baliṃ datvā maṅgalanakkhattena patiṭṭhāpetuṃ vaṭṭatīti. Tenahi evaṃ karothāti. Tadā bodhisatto takkāriyonāma māṇavo hutvā tassa santike sippaṃ uggaṇhāti. Purohito purāṇadvāraṃ hāretvā navaṃ patiṭṭhāpetvā rājānaṃ āha niṭṭhitaṃ deva dvāraṃ sve bhaddakanakkhattaṃ taṃ anatikkamitvā baliṃ katvā dvāraṃ patiṭṭhāpetuṃ vaṭṭatīti. Tenahi ācariya balikammatthāya kiṃ laddhuṃ vaṭṭatīti. Deva mahesakkhaṃ dvāraṃ mahesakkhadevatāhi pariggahitaṃ ekaṃ piṅgalaṃ nikkhantadāḍhaṃ ubhato visuddhaṃ brāhmaṇaṃ māretvā tassa maṃsalohitena baliṃ katvā sarīraṃ heṭṭhā khipitvā dvāraṃ patiṭṭhāpetabbaṃ evaṃ tumhākañca nagarassa ca sotthi bhavissatīti. Sādhu ācariya evarūpaṃ brāhmaṇaṃ māretvā dvāraṃ patiṭṭhāpehīti. So tuṭṭhamānaso seva paccāmittassa Piṭṭhiṃ passissāmīti ussāhajāto attano gehaṃ gantvā mukhaṃ rakkhituṃ asakkonto turitaturito bhariyaṃ āha pāpe caṇḍāli ito paṭṭhāya kena saddhiṃ abhiramissasi sve te jāraṃ māretvā balikammaṃ karissāmīti. Niraparādhaṃ kiṃkāraṇā māressasīti. Rājā kaḷārapiṅgalassa brāhmaṇassa maṃsalohitena balikammaṃ katvā nagaradvāraṃ patiṭṭhāpehīti āha jāro ca te kaḷārapiṅgalo taṃ māretvā balikammaṃ karissāmīti. Sā jārassa santikaṃ sāsanaṃ pāhesi rājā kira kaḷārapiṅgalaṃ brāhmaṇaṃ māretvā baliṃ kātukāmo sace jīvitukāmo aññepi tayā sadise brāhmaṇe gahetvā sakālasseva palāyassūti. So tathā akāsi. Taṃ nagare pākaṭaṃ ahosi. Sakalanagarato sabbe kaḷārapiṅgalā palāyiṃsu. Purohito amittassa palātabhāvaṃ ajānitvā pātova rājānaṃ upasaṅkamitvā deva asukaṭṭhāne kaḷārapiṅgalo brāhmaṇo atthi taṃ gaṇhāpethāti āha. Rājā amacce pesesi. Te taṃ apassantā āgantvā palāto kirāti ārocesuṃ. Aññattha upadhārethāti. Sakalanagare upadhārentāpi na passiṃsu. Tato aññaṃ upadhārethāti vutte deva ṭhapetvā purohitaṃ añño evarūpo natthīti vadiṃsu. Purohitaṃ na sakkā māretunti. Deva kiṃ vadetha purohitassa kāraṇā ajja dvāre apatiṭṭhāpite nagaraṃ aguttaṃ bhavissati ācariyo kathento ajja atikkamitvā ito saṃvaccharaccayena nakkhattaṃ labhissasīti kathesi saṃvaccharaṃ nagare advārake Paccatthikānaṃ okāso bhavissati imaṃ māretvā aññena byattena brāhmaṇena balikammaṃ kāretvā dvāraṃ patiṭṭhāpessāmāti. Atthi panañño ācariyasadiso paṇḍitabrāhmaṇoti. Atthi deva tasseva antevāsiko takkāriyamāṇavonāma tassa purohitaṭṭhānaṃ datvā maṅgalaṃ karothāti. Rājā taṃ pakkosāpetvā sammānaṃ kāretvā purohitaṭṭhānaṃ datvā tathā kātuṃ āṇāpesi. So mahantena parivārena nagaradvāraṃ agamāsi. Purohitaṃ rājānubhāvena bandhitvā ānayiṃsu. Mahāsatto dvāraṭhapanaṭṭhāne āvāṭaṃ khaṇāpetvā sāṇiṃ parikkhipāpetvā ācariyena saddhiṃ antosāṇiyaṃ aṭṭhāsi. Ācariyo āvāṭaṃ olokento attano patiṭṭhaṃ alabhanto anattho tāva me nipphādito ahosi bālatāya pana mukhaṃ rakkhituṃ asahanto vegena pāpitthiyā kathesiṃ attanāva me attano vadho ābhatoti mahāsattaṃ ālapanto paṭhamaṃ gāthamāha