atīte rājagahe magadharājānāma rajjaṃ kāresi. Tadā nagarato pubbuttarāya disāya sālindiyonāma brāhmaṇagāmo ahosi. Tassa pubbuttaradisāya magadhakhettaṃ. Tattha kosiyagottonāma sālindiyavāsī brāhmaṇo sahassakarīsamattaṃ khettaṃ gahetvā sāliṃ vapāpesi. Uṭṭhite ca pana sasse vatiṃ thiraṃ kāretvā kassaci paṇṇāsakarīsamattaṃ kassaci saṭṭhīkarīsamattanti evaṃ pañcasatakarīsamattaṃ khettaṃ attano parisānaññeva ārakkhaṇatthāya datvā sesaṃ pañcasatakarīsamattaṃ vatiṃ Katvā ekassa bhatikassa adāsi. So tattha kuṭiṃ katvā tattha rattindivaṃ vasati. Khettassa pana pubbuttaradisāyaṃ ekasmiṃ sānupabbate mahantaṃ simbalīvanaṃ atthi. Tattha anekāni suvasatāni vasanti. Tadā bodhisatto tasmiṃ suvasaṃghe suvarañño putto hutvā nibbatti. So vayappatto abhirūpo thāmasampanno sakaṭanābhippamāṇasarīro ahosi. Athassa pitā mahallakakāle ahaṃ idāni dūraṃ gantuṃ na sakkomi tvaṃ imaṃ gaṇaṃ pariharāti puttassa rajjaṃ niyyādeti. So punadivasato paṭṭhāya mātāpitūnaṃ gocaratthāya gantuṃ nādāsi. Suvagaṇaṃ pariharanto himavantaṃ gantvā sayaṃjātasālivanesu yāvadatthaṃ sāliṃ khāditvā āgamanakāle mātāpitūnaṃ pahonakaṃ gocaraṃ ādāya āgantvā mātāpitaro posesi. Athassa ekadivasaṃ suvā ārocesuṃ pubbe imasmiṃ kāle magadhakhette sāliṃ vapati idāni kinnu kho katanti. Tenahi jānāthāti dve suve pahiṇi. Suvā gantvā magadhakhette otarantā tassa bhatiyā rakkhaṇapurisassa khette otaritvā sāliṃ khāditvā ekaṃ sālisīsaṃ ādāya simbalīvanaṃ āgantvā sālisīsaṃ mahāsattassa pādamūle ṭhapetvā tattha evarūpo sālīti vadiṃsu. So punadivase suvagaṇaparivuto tattha gantvā tasmiṃ bhatikassa khette otari. So pana puriso suve sāliṃ khādante disvā itocito ca dhāvitvā vārentopi vāretuṃ na sakkoti. Sesā suvā yāvadatthaṃ sāliṃ khāditvā tucchamukhāva gacchanti. Suvarājā pana bahūni sālisīsāni ekato katvā tuṇḍenādāya purato gantvā āharitvā Mātāpitūnaṃ deti. Suvā pana punadivasato paṭṭhāya tattheva sāliṃ khādiṃsu. Atha so puriso suve sāliṃ khādante disvā itocito ca dhāvitvā vārentopi vāretuṃ nāsakkhi sace ime aññaṃ katipāhaṃ evaṃ khādissanti kiñci na bhavissati brāhmaṇo sāliṃ agghāpetvā mayhaṃ iṇaṃ karissati gantvā tassa ārocessāmīti. So sālimuṭṭhinā saddhiṃ tathārūpaṃ paṇṇākāraṃ gahetvā sālindiyagāmaṃ gantvā brāhmaṇaṃ passitvā vanditvā paṇṇākāraṃ datvā ekamantaṃ ṭhito kiṃ bho purisa sampannaṃ sālikhettanti puṭṭho āma brāhmaṇa sampannanti vatvā dve gāthā abhāsi