2. Candakinnarajātakaṃ.

Upanīyatidaṃ maññeti idaṃ satthā kapilavatthupuraṃ upanissāya nigrodhārāme viharanto rājanivesane rāhulamātaraṃ ārabbha kathesi. Idaṃ pana jātakaṃ dūrenidānato paṭṭhāya kathetabbaṃ. Sā panesā nidānakathā yāva laṭṭhivane uruvelakassapassa sīhanādā apaṇṇakajātake kathitā. Tato paraṃ yāva kapilavatthugamanā vessantarajātake āvībhavissati.

Satthā pana pitu nivesane nisīditvā antarābhattasamaye mahādhammapālajātakaṃ kathetvā katabhattakicco rāhulamātu nivesane nisīditvā tassā guṇe kathento candakinnarajātakaṃ kathessāmīti rājānaṃ pattaṃ gāhāpetvā dvīhi aggasāvakehi saddhiṃ rāhulamātu nivesanaṭṭhānaṃ pāyāsi. Tadā tassā pamukhā cattāḷīsasahassanāṭakitthiyo vasanti. Tāsu khattiyakaññānañceva navutiadhikasahassaṃ. Sā tathāgatassa āgamanaṃ ñatvā sabbā kāsāyāneva nivāsentūti tāsaṃ ārocesi. Tā tathā kariṃsu. Satthā āgantvā paññattāsane nisīdi. Atha tā sabbāpi ekappahāreneva viraviṃsu. Mahāparidevasaddo Ahosi. Rāhulamātāpi paridevitvā sokaṃ vinodetvā satthāraṃ vanditvā rājagatena bahumānena sagāravena nisīdi. Tadā rājā tassā guṇakathaṃ ārabbha bhante mama suṇisā tumhehi kāsāvāni nivatthānīti sutvā kāsāvāneva nivāsesi mālādīni pariccattānīti sutvā mālādīni pariccaji uccāsayanamahāsayanāni pariccattānīti sutvā bhūmisayanāva jātā tumhākaṃ pabbajitakāle vidhavā hutvā aññehi rājūhi pesitaṃ paṇṇākāraṃ na gaṇhi evaṃ tumhesu asaṃhiracittā esāti nānappakārena tassā guṇakathaṃ kathesi. Satthā anacchariyaṃ mahārāja yaṃ esā idāni mama pacchime attabhāve mayi sasinehā asaṃhiracittā anaññaneyyā bhaveyya tiracchānayoniyaṃ nibbattāpi mayi asaṃhiracittā anaññaneyyā ahosīti vatvā tena yācito atītaṃ āhari

atīte bārāṇasiyaṃ brahmadatte rajjaṃ kārente bodhisatto himavantappadese kinnarayoniyaṃ nibbatti. Candā nāmassa bhariyā. Te ubhopi candanāmake rajaṭapabbate vasiṃsu. Tadā bārāṇasīrājā amaccānaṃ rajjaṃ niyyādetvā dve kāsāvāni nivāsetvā sannaddhapañcāvudho ekakova himavantaṃ pāvisi. So migavadhaṃ maṃsaṃ khādanto ekaṃ khuddakanadiṃ anupubbena sañcaranto uddhaṃ abhirūhi. Candapabbatavāsino kinnarā vassārattasamaye anotaritvā pabbateyeva vasanti nidāghe otaranti. Tadā so candakinnaro attano bhariyāya saddhiṃ otaritvā tesu tesu ṭhānesu gandhe vilimpanto Pupphareṇuṃ khādanto pupphapaṭakena nivāsento pārupanto latādolādīhi kīḷanto madhurasarena gāyanto taṃ khuddakanadiṃ patvā ekasmiṃ nivattaṭṭhāne otaritvā udake pupphāni vikīritvā udakakīḷaṃ kīḷitvā pupphapaṭakena nivāsetvā pārupitvā rajaṭapaṭṭavaṇṇāya bālukāya pupphasayanaṃ paññāpetvā ekaṃ veḷudaṇḍakaṃ gahetvā sayane nisīdi. Tato candakinnaro veḷuṃ vādento madhurasaddena gāyi. Candakinnarī muduhatthe nāmetvā tassāvidūre ṭhitā nacciceva gāyi ca. So rājā tesaṃ saddaṃ sutvā padasaddaṃ asāvento saṇikaṃ gantvā paṭicchanne ṭhatvā te kinnare disvā kinnariyā paṭibaddhacitto hutvā taṃ kinnaraṃ vijjhitvā jīvitakkhayaṃ pāpetvā imāya saddhiṃ saṃvāsaṃ kappessāmīti cintetvā candakinnaraṃ vijjhi. So vedanāppatto paridevamāno catasso gāthā abhāsi