Tattha mahesīti aggamahesī. Rucinoti surucissa rañño. Paṭhamanti soḷasannaṃ itthīsahassānaṃ sabbapaṭhamaṃ. Yaṃ manti yasmiṃ kāle sukhasaṃvāsāya maṃ suruci ānayi tato paṭṭhāya ahaṃ dasa vassasahassāni ekikāva imasmiṃ gehe vasiṃ. Atimaññitthāti muhuttampi sammukhā vā parammukhā vā atikkamitvā maññinti na abhijānāmi na sarāmi. Iseti taṃ ālapati. Te manti sassuro ca sassu cāti te ubhopi maṃ. Vinetāroti tehi vinītamhi te mama yāva jīviṃsu tāva ovādamadaṃsu. Ahiṃsāratinīti ahiṃsāsaṅkhātāya aratiyā samannāgatā mayā hi kuṇṭhakipillikādi koci na hiṃsitapubbo. Kāmasāti ekanteneva. Dhammacārinīti dasakusalakammapathesu pūremi. Upaṭṭhāsinti pādaparikammādīni kiccāni karontī upaṭṭhahiṃ. Sahabhariyānīti mayā saha ekasāmikassa bhariyābhūtāni. Nāhūti kilesaṃ Nissāya issādhammo vā kodhadhammo vā mayhaṃ na bhūtapubbo. Hitenāti yaṃ tāsaṃ hitaṃ teneva nandāmi ure puttadhītaroviya tā disvā tussāmi. Kācīti tāsu ekāpi mayhaṃ appiyānāma natthi sabbāpi dayātāyeva. Anukampāmīti muducittena tāni sabbāni soḷasasahassānipi attānaṃviya anukampāmi. Sahadhammenāti yena kāraṇena yo yaṃ kātuṃ sakkoti sā taṃ tasmiṃ kamme payojemīti attho. Pamuditindriyāti pesentī niccaṃ pamuditindriyāva hutvā pesemi are duṭṭhadāsi idaṃnāma karohīti evaṃ kujjhitvā na me koci katthaci pesitapubbo. Payatapāṇinīti dhotahatthā pasāritahatthāva hutvā. Pārihāriyapakkhañcāti pañcamī aṭṭhamī cātuddasī paṇṇarasīti paccuggamanānuggamanavasena cattāro divasā. Sadāti niccakālaṃ pañcasu sīlesu saṃvutā tehi pihitagopitattabhāvā homīti.

Evaṃ tassā gāthāsatenapi gāthāsahassenapi vaṇṇiyamānānaṃ guṇānaṃ pamāṇannāma natthi. Tāya paṇṇarasahi gāthāhi attano guṇaṃ vaṇṇitakāleyeva sakko attano bahukaraṇīyatāya tassā kathaṃ avacchinditvā abbhūtāyeva te guṇāti taṃ pasaṃsanto gāthadvayamāha

sabbeva te dhammaguṇā rājaputti yasassini

saṃvijjanti tayi bhadde ye tvaṃ kittesi attani.