Tattha ye kukkurāti ye sunakhā. Yathā hi dhāruṇhopi passāvo pūtimuttanti tadahujātopi siṅgālo jarasiṅgāloti komalāpi galocilatā pūtilatāti suvaṇṇavaṇṇopi kāyo pūtikāyoti vuccati evameva vassasatikopi sunakho kukkuroti vuccati tasmā mahallakā kāyabalūpapannāpi te kukkurātveva vuttā. Vaḍḍhāti vaḍḍhitā. Koleyyakāti rājakule jātā sambhūtā saṃvaḍḍhā. Vaṇṇabalūpapannāti Sarīravaṇṇena ceva kāyabalena ca sampannā. Teme na vajjhāti te ime sassāmikā sārakkhā na vajjhā. Mayamasma vajjhāti assāmikā anārakkhā mayaṃ vajjhā nāma jātā. Nāyaṃ saghaccāti evaṃ sante ayaṃ avisesena saghaccā nāma na hoti. Dubbalaghātikāyanti ayaṃ pana dubbalānaṃyeva ghātanato dubbalaghātikā nāma hoti rājūhi nāma corā niggahitabbā no acorā idha pana corānaṃ kiñci natthi acorā maraṇaṃ labhanti aho imasmiṃ loke ayuttaṃ vattati aho adhammo vattatīti.
Rājā bodhisattassa vacanaṃ sutvā āha jānāsi pana tvaṃ paṇḍita asukehi nāma rathacammaṃ khāditanti. Āma jānāmīti. Kehi khāditanti. Tumhākaṃ gehe vasanakehi koleyyakasunakhehīti. Kathaṃ tehi khāditabhāvo jānitabboti āha. Ahaṃ tehi khāditabhāvaṃ desissāmīti. Dassehi paṇḍitāti. Tumhākaṃ ghare koleyyakasunakhe ānāpetvā thokaṃ takke ca dabbatiṇāni ca āharāpethāti. Rājā tathā akāsi. Atha naṃ mahāsatto imāni tiṇāni takkena maddāpetvā ete sunakhe pāyethāti āha. Rājā tathā katvā pāyāpesi. Pītapītā sunakhā saddhiṃ cammehi vamiṃsu. Rājā sabbaññubuddhassa byākaraṇaṃ viyāti tuṭṭho bodhisattassa setacchattena pūjaṃ akāsi. Bodhisatto dhammañcara mahārāja mātāpitūsu khattiyāti ādīhi te sakuṇajātake āgatāhi dasadhammacariyagāthāhi rañño dhammaṃ desetvā mahārāja ito paṭṭhāya Appamatto hohīti rājānaṃ pañcasu sīlesu patiṭṭhāpetvā setacchattaṃ raññova puna adāsi. Rājā mahāsattassa dhammakathaṃ sutvā sabbasattānaṃ abhayaṃ datvā bodhisattaṃ ādiṃ katvā sabbasunakhānaṃ attano bhojanasadisameva niccabhattaṃ paṭṭhapetvā bodhisattassa ovāde ṭhito yāvatāyukaṃ dānādīni puññāni karitvā kālaṃ katvā devaloke uppajji. Kukkurovādo dasavassasahassāni pavattati. Bodhisattopi yāvatāyukaṃ ṭhatvā yathākammaṃ gato.