Atha naṃ mahāsatto jātisambhedavītikkamaṃ akatvāva katipāhaṃ gehe vasāpetvā cintesi ahameva taṃ lābhaggayasaggappattaṃ karonto pabbajitvāva kātuṃ sakkhissāmi na itarathāti. Atha naṃ āmantetvā bhadde mayi araññato kiñci anāharante amhākaṃ jīvikā nappavattati yāva mamāgamanā mā ukkaṇṭhi ahaṃ araññaṃ gamissāmīti vatvā gehavāsinopi imaṃ mā pamajjathāti ovaditvā araññaṃ gantvā samaṇapabbajjaṃ pabbajitvā appamatto sattame divase aṭṭhasamāpattiyo pañcābhiññāyo ca uppādetvā idāni diṭṭhamaṅgalikāya avassayo bhavituṃ sakkhissāmīti iddhiyā āgantvā caṇḍālagāmadvāre otaritvā Diṭṭhamaṅgalikāya gehadvāraṃ agamāsi. Sā tassāgamanaṃ sutvā gehato nikkhamitvā sāmi kasmā maṃ anāthaṃ katvā pabbajitosīti paridevi. Atha naṃ bhadde mā cintayi tava porāṇakayasato idāni mahantataraṃ yasaṃ karissāmi apica kho pana na mayhaṃ mātaṅgapaṇḍito sāmiko mahābrahmā me sāmikoti ettakaṃpi parisamajjhe vattuṃ sakkhissasīti. Āma sāmi sakkhissāmīti. Tenahi idāni te sāmiko kuhinti puṭṭhā brahmalokaṃ gatoti vatvā kadā āgamissatīti vutte ito sattame divase puṇṇamāyaṃ candaṃ bhinditvā āgamissatīti vadeyyāsīti āha. Iti naṃ vatvā mahāsatto himavantameva gato. Diṭṭhamaṅgalikāpi bārāṇasiyaṃ mahājanamajjhe tesu tesu ṭhānesu tathā kathesi. Mahājano amhākaṃ mahābrahmā samāno diṭṭhamaṅgalikaṃ kiṃ na lacchati evametaṃ bhavissatīti saddahati.
Bodhisattopi puṇṇamīdivase candassa gaganamajjhe ṭhitakāle brahmattabhāvaṃ māpetvā sakalakāsikaraṭṭhaṃ dvādasayojanikaṃ bārāṇasinagarañca ekobhāsaṃ katvā candamaṇḍalaṃ bhinditvā otaritvā bārāṇasiyā uparūpari tikkhattuṃ paribbhamitvā mahājanena gandhamālādīhi pūjiyamāno caṇḍālagāmakābhimukho ahosi. Brahmabhattā sannipatitvā caṇḍālagāmakaṃ gantvā diṭṭhamaṅgalikāya gehaṃ suddhavatthehi chādetvā bhūmiyaṃ catujātiyagandhehi upalimpitvā pupphāni vikiritvā dhūpaṃ katvā celavitānaṃ pasāretvā mahāsayanaṃ paññapetvā gandhatelappadīpaṃ jāletvā dvāre rajaṭapaṭṭavaṇṇavālukaṃ okiritvā pupphāni vikiritvā dhaje Bandhiṃsu. Evaṃ alaṅkate gehe mahāsatto otaritvā anto pavisitvā thokaṃ sayanapiṭṭhe nisīdi. Tadā diṭṭhamaṅgalikā utunī hoti. Athassā aṅguṭṭhakena nābhiṃ parāmasi. Kucchiyaṃ gabbho patiṭṭhāsi. Atha naṃ mahāsatto āmantetvā bhadde gabbho te patiṭṭhito tvaṃ puttaṃ vijāyissasi tvaṃpi puttopi te lābhaggayasaggappattā bhavissatha tava pādadhovanaudakaṃ sakalajambūdīparājūnaṃ abhisekodakaṃ bhavissati nahānodakaṃ pana te amatosadhaṃ bhavissati ye sīse āsiñcissanti te sabbarogehi muccissanti kāḷakaṇṇīhi parivajjissanti tava pādapiṭṭhiyaṃ sīsaṃ ṭhapetvā vandantā sahassaṃ dassanti sotapathe ṭhatvā vandantā sataṃ dassanti cakkhupathe ṭhatvā vandantā ekaṃ kahāpaṇaṃ dassanti appamattā hohīti taṃ ovaditvā gehā nikkhamitvā mahājanassa passantasseva uppatitvā candamaṇḍalaṃ pāvisi.