Tattha kvattha gatāti imesu tīsu dvāresu ṭhapitā upajotiyo ca upavajjho ca bhaṇḍakucchi cāti tayo dovārikā kvattha gatāti attho.

Tepi tassa vacanaṃ sutvā vegenāgantvā vanditvā kiṃ karoma devāti āhaṃsu. Ayaṃ vo jammo caṇḍālo diṭṭhoti. Na passāma devāti. Kutoci āgatabhāvaṃ na jānāma devāti. Koci esa māyākāro vā vijjādharacoro vā bhavissatīti. Idāni kiṃ tiṭṭhathāti. Kiṃ karoma devāti. Imassa mukhameva pothetvā bhindantā daṇḍaveḷupesikāhi piṭṭhicammaṃ uppādetvā vadhañca datvā gale gahetvā etaṃ jammaṃ galayātha ito nīharathāti. Mahāsatto tesu attano santikaṃ anāgatesveva uppatitvā ākāse ṭhitova gāthamāha

giriṃ nakhena khanasi ayodantebhi khādasi

jātavedaṃ padahasi yo isiṃ paribhāsasīti.