Tattha nālanti na samattho. Kabalanti bhojanakāle paṭhamameva dinnaṃ kabalaṃ. Padātaveti pādātave. Sandhivasena ākāralopo veditabbo. Gahetunti attho. Na piṇḍanti vaḍḍhetvā dīyamānaṃ bhattapiṇḍaṃpi nālaṃ gahetuṃ. Na kuseti khādanatthāya dinnāni tiṇānipi nālaṃ gahetuṃ. Na ghaṃsitunti nhāpiyamāno sarīraṃpi ghaṃsituṃ Nālaṃ. Evaṃ yaṃ yaṃ so hatthī kātuṃ na samattho taṃ taṃ sabbaṃ rañño ārocetvā tassa asamatthabhāve attanā sallakkhitaṃ kāraṇaṃ ārocento maññāmīti ādimāha.

Rājā tassa bodhisattassa vacanaṃ sutvā idāni kiṃ kattabbaṃ paṇḍitāti pucchi. Amhākaṃ kira maṅgalahatthissa sahāyaṃ sunakhaṃ eko manusso gahetvā gato yassa ghare taṃ sunakhaṃ passanti tassa ayaṃ nāma daṇḍoti bheriṃ cārāpetha devāti. Rājā tathā kāresi. Taṃ pavuttiṃ sutvā so puriso sunakhaṃ vissajjesi. So sunakho vegena gantvā hatthissa santikameva agamāsi. Hatthī taṃ soṇḍāya gahetvā kumbhe ṭhapetvā roditvā paridevitvā kumbhā otāretvā tena bhutte pacchā attanā bhuñji. Tiracchānagatassa āsayaṃ jānātīti rājā bodhisattassa mahantaṃ yasaṃ adāsi.

Satthā na bhikkhave ime idāneva vissāsikā pubbepi vissāsikāti imaṃ dhammadesanaṃ āharitvā catussaccakathāya vinivaṭṭetvā anusandhiṃ ghaṭetvā jātakaṃ samodhānesi. Idaṃ catussaccakathāya vinivaṭṭanaṃ nāma sabbajātakesupi atthiyeva mayaṃ pana naṃ yatthassa ānisaṃso paññāyati tattheva dassayissāmāti. Tadā sunakho upāsako ahosi hatthī mahallakatthero rājā ānando amaccapaṇḍito pana ahameva ahosīti.

Abhiṇhajātakaṃ sattamaṃ.