Sīvirājajātakaṃ

dūre ca vasaṃ therovāti idaṃ satthā jetavane viharanto asadisadānaṃ ārabbha kathesi. Taṃ aṭṭhanipāte sīvirājajātake vitthāritameva.

Tadā pana rājā sattame divase sabbaparikkhāre datvā anumodanaṃ Yāci. Satthā avatvāva pakkāmi. Rājā bhuttapātarāso vihāraṃ gantvā kasmā bhante anumodanaṃ na karitthāti āha. Satthā aparisuddhā mahārāja parisāti vatvā na ve kadariyā devalokaṃ vajantīti gāthāya dhammaṃ desesi. Rājā pasīditvā satasahassagghanikena sīveyyakena uttarāsaṅgeneva tathāgataṃ pūjetvā nagaraṃ pāvisi. Punadivase bhikkhū dhammasabhāyaṃ kathaṃ samuṭṭhāpesuṃ āvuso kosalarājā asadisadānaṃ datvā tādisenāpi dānena atitto dasabalena dhamme desite puna satasahassagghanikaṃ sīveyyakaṃ vatthaṃ adāsi yāva atitto vatāvuso dānena rājāti. Satthā āgantvā kāyanuttha bhikkhave etarahi kathāya sannisinnāti pucchitvā imāya nāmāti vutte na bhikkhave bāhirabhaṇḍaṃ nāma sudinnaṃ porāṇakapaṇḍitā sakalajambūdīpaṃ unnaṅgalaṃ katvā devasikaṃ chasatasahassapariccāgena dānaṃ dadamānā bāhirakadānena atittā piyassa dātā piyaṃ labhatīti sampattā yācakānaṃ akkhīni uppāṭetvā adaṃsūti vatvā atītaṃ āhari.

Atīte sīviraṭṭhe ariṭṭhapuranagare sīvimahārāje rajjaṃ kārente mahāsatto tassa putto hutvā nibbatti. Sīvikumārotissa nāmaṃ kariṃsu. So vayappatto takkasilaṃ gantvā uggahitasippo āgantvā pitu sippaṃ dassetvā uparajjaṃ labhitvā aparabhāge pituaccayena rājā hutvā agatigamanaṃ pahāya dasa rājadhamme akopetvā dhammena rajjaṃ kārento catūsu nagaradvāresu nagaramajjhe nivesanadvāre cāti cha dānasālāyo kāretvā devasikaṃ chasatasahassapariccāgena mahādānaṃ Pavattesi aṭṭhamīcātuddasīpaṇṇarasīsu ca niccaṃ dānasālaṃ gantvā dānaṃ olokesi.