So ekadā puṇṇamīdivase pātova samussitasetacchatte rājapallaṅke nisinno attanā dinnadānaṃ āvajjento bāhiravatthuṃ attanā adinnaṃ nāma adisvā mayā bāhiravatthuṃ adinnaṃ nāma natthi na maṃ bāhiradānaṃ toseti ahaṃ ajjhattikadānaṃ dātukāmo aho vatajja mama dānasālaṃ gatakāle kocideva yācako bāhiravatthuṃ ayācitvā ajjhattikassa nāmaṃ gaṇheyya sace hi me koci hadayamaṃsassa nāmaṃ gaṇheyya kaṇayena uraṃ paharitvā pasannaudakato sanālaṃ padumaṃ uddharanto viya lohitabindūni paggharantaṃ hadayaṃ nīharitvā dassāmi sace sarīramaṃsassa nāmaṃ gaṇheyya avalekhanasatthakena telasiṅgaṃ likkhanto viya sarīramaṃsaṃ otāretvā dassāmi sace lohitassa nāmaṃ gaṇheyya yantamukhe pakkhanditvā upanītabhājanaṃ pūretvā lohitaṃ dassāmi sace vā pana koci gehe me kammaṃ nappavattati gehe me dāsakammaṃ karohīti maṃ vadeyya rājavesaṃ apanetvā bāhiraṃ katvā attānaṃ sāvetvā dāsakammaṃ karissāmi sace me koci akkhīnaṃ nāmaṃ gaṇheyya tālamiñjaṃ nīharanto viya akkhīni uppāṭetvā dassāmīti cintesi. Iti so

yaṃ kiñci mānusaṃ dānaṃ adinnaṃ me na vijjati

yopi yāceyya maṃ cakkhuṃ dadeyyaṃ avikampitoti cintetvā soḷasahi gandhodakaghaṭehi nahāyitvā Sabbālaṅkārapaṭimaṇḍito nānaggarasabhojanaṃ bhuñjitvā alaṅkatahatthikkhandhavaragato dānaggaṃ agamāsi.

Sakko tassa ajjhāsayaṃ viditvā sīvirājā ajja sampattayācakānaṃ cakkhūni uppāṭetvā dassāmīti cintesi sakkhissati nukho dānaṃ dātuṃ udāhu noti cintetvā tassa vīmaṃsanatthāya jarājiṇṇapatto andhabrāhmaṇo viya hutvā rañño dānaggaṃ gamanakāle ekasmiṃ unnatappadese hatthaṃ pasāretvā rājānaṃ jayāpetvā aṭṭhāsi. Rājā tadabhimukhaṃ vāraṇaṃ pesetvā brāhmaṇa kiṃ vadesīti pucchi. Atha naṃ sakko mahārāja tava dānajjhāsayataṃ nissāya samuggatena kittighosena sakalalokasannivāsonirantaraṃ phuṭṭho ahañca andho tvaṃ dvicakkhūti vatvā cakkhuṃ yācanto paṭhamaṃ gāthamāha