Tassattho samma sīvika tvaṃ mayhaṃ sahāyo ca mitto ca vejjasippeva susikkhito sādhu me vacanaṃ karohi mama jigiṃsetvā upadhārentassa olokentasseva tālabījaṃ viya me akkhīni uddharitvā imassa yācakassa hatthesu ṭhapehīti.
Atha naṃ sīviko āha cakkhudānaṃ nāma bhāriyaṃ upadhārehi devāti. Sīvika upadhāritaṃ mayā tvaṃ mā papañcaṃ karohi mā mayā saddhiṃ bahū kathehīti. So cintesi ayuttaṃ mādisassa susikkhitassa vejjassa rañño akkhīsu satthapātananti. So nānābhesajjāni ghaṃsitvā bhesajjarasacuṇṇena nīluppalaṃ paribhāvetvā dakkhiṇakkhiṃ upasiṃghāpesi. Akkhi parivatti. Dukkhā vedanā uppajji. Sallakkhehi mahārāja paṭipākatikaṃ karaṇaṃ mayhaṃ bhāroti. Apehi tāta mā papañcaṃ karīti. So paribhāvetvā punapi upasiṃghāpesi. Akkhi akkhikūpato mucchi. Balavatarā vedanā udapādi. Sallakkhehi mahārāja sakkomahaṃ paṭipākatikaṃ kātunti. Apehi tāta mā papañcaṃ karīti. So tatiyavāre kharataraṃ paribhāvetvā upanāmesi. Akkhi osadhabalena paribbhamitvā akkhikūpato nikkhamitvā nahārusuttakena olambamānaṃ aṭṭhāsi. Sallakkhehi narinda puna Pākatikakaraṇaṃ mayhaṃ balanti. Papañcaṃ mā karīti. Adhimattā vedanā udapādi. Lohitakaṃ paggharati nivatthasāṭakāni lohitena temiṃsu. Orodhā ca amaccā ca rañño pādamūle patitvā deva akkhīni mā dehīti mahāparidevaṃ parideviṃsu. Rājā vedanaṃ adhivāsetvā tāta mā papañcaṃ karīti āha. So sādhu devāti vāmahatthena akkhiṃ dhāretvā dakkhiṇahatthena satthakaṃ ādāya akkhisuttakaṃ chinditvā akkhiṃ gahetvā mahāsattassa hatthe ṭhapesi. So vāmakkhinā dakkhiṇakkhiṃ oloketvā vedanaṃ adhivāsetvā ehi brāhmaṇāti brāhmaṇaṃ pakkositvā mama ito akkhito sataguṇena sahassaguṇena satasahassaguṇena sabbaññutañāṇameva piyataraṃ tassa idaṃ me paccayo hotūti vatvā brāhmaṇassa akkhiṃ adāsi. So taṃ ukkhipitvā attano akkhimhi ṭhapesi. Taṃ tassānubhāvena vikasitanīluppalaṃ viya hutvā patiṭṭhāsi. Mahāsatto vāmakkhinā tassa taṃ akkhiṃ disvā aho sudinnaṃ mayā akkhidānanti anto samuggatāya pītiyā nirantaraṃ phuṭṭho hutvā itaraṃpi akkhiṃ adāsi. Sakko tampi attano akkhimhi ṭhapetvā rājanivesanā nikkhamitvā mahājanassa olokentasseva nagarā nikkhamitvā devalokameva gato.