samantā yojanasataṃ dassanaṃ anubhontu teti.

Tattha dhammena bhāsitāti mahārāja imā te gāthā dhammena sabhāvena bhāsitā. Dibyānīti dibbānubhāvayuttāni. Paṭidissareti paṭidissanti. Tirokuḍḍanti mahārāja imāni te cakkhūni devatānaṃ cakkhūni viya parakuḍḍaṃ paraselaṃ yaṃkiñci pabbataṃpi samatiggayha atikkamitvā samantā dasadisā yojanasataṃ rūpadassanaṃ anubhontu sodhentūti attho.

Iti so ākāse ṭhatvā mahājanassa majjhe imā gāthā bhāsitvā appamatto hohīti mahāsattaṃ ovaditvā devalokameva gato.

Mahāsattopi mahājanaparivuto mahantena sakkārena nagaraṃ pavisitvā sucandakaṃ pāsādaṃ abhiruhi. Tena cakkhūnaṃ paṭiladdhabhāvo sakalasīviraṭṭhe pākaṭo jāto. Athassa dassanatthaṃ sakalaraṭṭhavāsino bahuṃ paṇṇākāraṃ gahetvā āgamiṃsu. Mahāsatto imasmiṃ mahājane sannipatite mama dānaṃ vaṇṇayissāmīti rājadvāre mahāmaṇḍapaṃ kāretvā samussitasetacchatte rājapallaṅke nisinno nagare bheriñcārāpetvā sabbaseniyo sannipātāpetvā ambho sīviraṭṭhavāsino imāni me dibbacakkhūni disvā ito paṭṭhāya dānaṃ adatvā mā bhuñjathāti dhammaṃ desento catasso gāthā abhāsi