paññājavena sampannā sammodanti tato tatoti.

Sataṃ eko ca me puttā dhataraṭṭha mayā sutā

tesaṃ tvaṃ kiccamakkhāhi nāvarujjhanti te vacoti.

Tattha kusalanti ārogyaṃ. Anāmayanti idaṃ tasseva vevacanaṃ. Phītanti kacci te idaṃ raṭṭhaṃ phītaṃ subhikkhaṃ dhammena ca naṃ anusāsasīti pucchi. Dosoti aparādho. Chāyā dakkhiṇatorivāti yathā nāma dakkhiṇadisābhimukhī chāyā na vaḍḍhati evaṃ te kacci amittā na Vaḍḍhantīti vadati. Sādisīti jātibhogaatigottakulapadesehi samānā evarūpā hi aticārinī na hoti. Assavāti vacanapaṭiggāhakā. Puttarūpayasūpetāti puttehi ca rūpena ca yasena ca upetā. Paññājavenāti paññāvegena paññaṃ javāpetvā tāni tāni kiccāni paricchindituṃ samatthāti pucchati. Sammodanti tato tatoti yattha yattha niyuttā honti tato tato sammodanteva. Mayā sutāti mayā vissutā maṃ hi loko bahuputtarājāti vadati iti te maṃ nissāya vissutā pākaṭā jātāti mayā sutā nāma hontīti vadati. Tesaṃ tvaṃ kiccamakkhāhīti tesaṃ mama puttānaṃ idaṃ nāma karontūti tvaṃ kiccamakkhāhi. Nāvarujjhantīti na te vacanaṃ avarujjhanti ovādaṃ nesaṃ dehīti adhippāyenevamāha.