Dve nagarānipi yuddheneva gahetuṃ asakkuṇeyyatāya ayuddhapurāni nāma jātāni devanagarañca asuranagarañca. Yadā hi asurā balavantā honti atha devehi palāyitvā devanagaraṃ pavisitvā Dvāre pidahite asurānaṃ satasahassampi kiñci kātuṃ na sakkoti. Yadā devā balavantā honti atha asurehi palāyitvā asuranagarassa dvāre pidahite sakkānaṃ satasahassampi kiñci kātuṃ na sakkoti. Iti imāni dve nagarāni ayujjhapurāni nāma. Tesaṃ antarā etesu uragādīsu pañcasu ṭhānesu sakkena rakkhā ṭhapitā. Tattha uragasaddena nāgā gahitā. Te uragā udake balavantā honti tasmā sinerussa paṭhamālinde tesaṃ ārakkhā. Karotisaddena supaṇṇā gahitā. Tesaṃ kira karoti nāma pānabhojanaṃ tena nāmaṃ labhiṃsu dutiyālinde tesaṃ ārakkhā. Payassa hārisaddena kumbhaṇḍā gahitā. Dānavarakkhasā kira te tatiyālinde tesaṃ ārakkhā. Madanayutasaddena yakkhā gahitā. Visamacārino kira te yuddhasoṇḍā catutthālinde tesaṃ ārakkhā. Caturo ca mahantāti cattāro mahārājāno vuttā. Pañcamālinde tesaṃ ārakkhā. Tasmā yadi asurā kupitā āvilacittā devapuraṃ upayanti pañcavidhesu yuddhesu yaṃ girino paṭhamaṃ paribhaṇḍaṃ taṃ uragā paṭibāhiya tiṭṭhanti. Evaṃ sesesu sesā.
Imesu pana pañcasu ṭhānesu ārakkhaṃ ṭhapetvā sakke devānaminde dibbasampattiṃ anubhavamāne sudhammā cavitvā tasseva pādaparicārikā hutvā nibbatti. Kaṇṇikāya dinnanissandena cassā pañcayojanasatikā sudhammā nāma devasabhā udapādi yattha Dibbasetacchattassa heṭṭhā yojanappamāṇe kāñcanapallaṅke nisinno sakko devānamindo devamanussānaṃ kattabbakiccāni karoti. Sucittāpi cavitvā tasseva pādaparicārikā hutvā nibbatti. Uyyānassa karaṇanissandena cassā cittalatāvanaṃ nāma uyyānaṃ udapādi. Sunandāpi cavitvā tasseva pādaparicārikā hutvā nibbatti. Pokkhaṇīnissandena cassā nandā nāma pokkharaṇī udapādi.
Sujātā pana kusalakammassa akatattā ekasmiṃ araññe kandarāya bakasakuṇikā hutvā nibbatti. Sakko sujātā na paññāyati kahaṃ nu kho nibbattāti āvajjento taṃ disvā tattha gantvā taṃ ādāya devalokaṃ gantvā tassā rammaṇīyaṃ devanagaraṃ sudhammādevasabhaṃ cittalatāvanaṃ nandapokkharaṇiñca dassetvā etā kusalaṃ katvā mayhaṃ pādaparicārikā hutvā nibbattā tvaṃ pana kusalaṃ akatvā tiracchānayoniyaṃ nibbattā ito paṭṭhāya sīlaṃ rakkhāhīti taṃ ovaditvā pañcasu sīlesu patiṭṭhāpetvā tattheva netvā vissajjesi. Sāpi tato paṭṭhāya sīlaṃ rakkhati. Sakko katipāhaccayena sakkā nu kho sīlaṃ rakkhitunti gantvā maccharūpena uttāno hutvā purato nipajji. Sā matamacchakoti saññāya sīse aggahesi. Maccho naṅguṭṭhaṃ cālesi. Atha naṃ jīvati maññeti vissajjeti. Sakko sādhu sādhu sakkhissasi sīlaṃ rakkhitunti devalokaṃ agamāsi. Sā tato cutā bārāṇasiyaṃ kumbhakāragehe nibbatti.