Atīte bārāṇasiyaṃ brahmadatto dhammena rajjaṃ kārento saddho pasanno ahosi dānasīlauposathakammesu appamatto. So sesepi amaccādayo dānādīsu samādapesi. Purohito panassa parapiṭṭhimaṃsiko lañcakhādako kūṭavinicchayiko ahosi. Rājā uposathadivase amaccādayo pakkosāpetvā uposathikā hothāti āha. Purohito uposathaṃ na samādayi. Atha naṃ divā lañcaṃ gahetvā kūṭaṭṭaṃ katvā upaṭṭhānaṃ āgataṃ rājā tumhe uposathikāti amacce pucchanto tvaṃ ācariya uposathikoti pucchi. So āmāti Musāvādaṃ katvā pāsādā otari. Atha naṃ eko amacco nanu tumhe na uposathikāti codesi. So āha ahaṃ velāyameva bhuñjiṃ gehaṃ pana gantvā mukhaṃ vikkhāletvā uposathaṃ adhiṭṭhāya sāyaṃ na bhuñjissāmi rattiṃ sīlaṃ rakkhissāmi evaṃ me upaḍḍhuposathakammaṃ bhavissatīti. Sādhu ācariyāti. So gehaṃ gantvā tathā akāsi. Punekadivasaṃ tasmiṃ vinicchaye nisinne aññatarā sīlavatī itthī aṭṭaṃ karontī gharaṃ gantuṃ alabhamānā uposathakammaṃ nātikkamissāmīti upakaṭṭhe kāle mukhaṃ vikkhāletuṃ ārabhi. Tasmiṃ khaṇe brāhmaṇassa supakkānaṃ ambaphalānaṃ ambapiṇḍī āhariyittha. So tassā uposathikabhāvaṃ ñatvā imāni khāditvā uposathikā hohīti adāsi. Sā tathā akāsi. Ettakaṃ brāhmaṇassa kammaṃ.

So aparabhāge kālaṃ katvā himavantappadese kosikigaṅgātīre tiyojanike ambavane ramaṇīye bhūmibhāge sobhaggappatte kanakavimāne alaṅkatasirisayane suttappabuddho viya nibbatti alaṅkatapaṭiyatto uttamarūpadharo soḷasasahassadevakaññāparivāro. So rattiññeva taṃ sirisampattiṃ anubhoti. Vimānakapetabhāvena hissa kammasarikkhako vipāko ahosi. Tasmā aruṇe uggacchante ambavanaṃ pavisati. Paviṭṭhakkhaṇeyevassa dibbattabhāvo antaradhāyi asītihatthatālakkhandhappamāṇo attabhāvo nibbatti sakalasarīraṃ jhāyati supupphitakiṃsuko viya ahosi. Dvīsu hatthesu ekekāva aṅgulī tattha mahākuddālappamāṇā nakhā honti. Tehi nakhehi attanova piṭṭhimaṃsaṃ Phāletvā uddharitvā uddharitvā khādanto vedanāppatto mahāviravaṃ viravanto dukkhaṃ anubhoti. Suriye atthaṅgate taṃ sarīraṃ antaradhāyi dibbasarīraṃ nibbatti. Alaṅkatapaṭiyattā dibbanāṭakitthiyo nānāturiyāni gahetvā parivārenti. So mahāsampattiṃ anubhavanto ramaṇīye ambavane dibbapāsādaṃ abhiruhati. Iti so uposathikāya itthiyā ambaphaladānassa nissandena tiyojanikaṃ ambavanaṃ paṭilabhati lañcaṃ gahetvā kūṭaṭṭakaraṇassa nissandena pana piṭṭhimaṃsaṃ uppāṭetvā khādi upaḍḍhuposathassa nissanadena yasaṃ anubhoti soḷasasahassanāṭakitthīhi parivuto paricāresi. Tasmiṃ kāle bārāṇasirājā kāmesu ādīnavaṃ disvā isipabbajjaṃ pabbajitvā adhogaṅgāya ramaṇīye bhūmippadese paṇṇasālaṃ kāretvā uñchācariyāya yāpento vihāsi. Athekadivasaṃ tamhā ambavanā mahāghaṭappamāṇaṃ ambapakkaṃ gaṅgāya patitvā sotena vuyhamānaṃ tassa tāpasassa paribhogatitthābhimukhaṃ āgami. So mukhaṃ dhovanto taṃ majjhe nadiyā āgacchantaṃ disvā udakaṃ taranto gantvā ādāya assamapadaṃ āharitvā agyāgāre ṭhapetvā satthakena phāletvā yāpanamattaṃ khāditvā sesaṃ kadalipaṇṇehi paṭicchādetvā punappunaṃ divase divase yāva parikkhayā khādi. Tasmiṃ pana khīṇe aññaṃ phalāphalaṃ khādituṃ nāsakkhi. Rasataṇhāya bajjhitvā tameva ambapakkaṃ khādissāmīti nadītīraṃ gantvā nadiṃ olokento ambaṃ alabhitvā na uṭṭhahissāmīti sanniṭṭhānaṃ katvā nisīdi. So tattha nirāhāro ekadivasaṃ dve tīṇi catupañcachadivasāni Vātātapena parisussanto ambaṃ olokento nisīdi.