puṭṭhāsi me cārupubbaṅgī brūhi nāmañca bandhaveti.

Tattha vāridharo kumbhoti udakaghaṭo. Suparināhavāti susaṇṭhāno. Vaṇṇagandharasuttamanti vaṇṇagandharasehi uttamaṃ. Disvānāti disvā. Amalamajjhimeti nimmalamajjhe. Devataṃ ālapanto evamāha. Pāṇībhīti hatthehi. Agyāyatanamāharinti attano aggihuttasālaṃ āhariṃ. Vikappetvāti vicchinditvā. Vikantetvātipi pāṭho. Khādinti pāṭhaseso. Ahāsi meti taṃ jivhagge ṭhapitamattameva sattarasaharaṇisahassāni pharitvā mama khuddañca pipāsañca hari. Apetadarathoti vigatakāyacittadaratho. Surasabhojanaṃ bhuñjantassa viya hi tassa taṃ sabbadarathaṃ apāhari. Byantībhūtoti tassa ambapakkassa vigatanto jāto parikkhīṇaambapakko hutvāti attho. Dukkhakkhamoti dukkhena asātena kāyakkhamena ceva cittakkhamena ca samannāgato. Aññesu pana kadalipanasādīsu phalesu parittakaṃpi assādaṃ nādhigacchāmi sabbāni me jivhāya ṭhapitamattāni tittakāneva sampajjantīti dīpeti. Sositvāti nirāhāratāya sositvā sukkhāpetvā. Taṃ mamanti taṃ mama. Yassāti yaṃ assa yaṃ hotīti attho. Idaṃ vuttaṃ hoti yaṃ phalāphalaṃ mama sādhu ahosi. Vuyhamānanti nadīgambhīraputhulaudakakkhandhasaṅkhāte mahaṇṇave vuyhamānaṃ. Tato udadhismā uddhariṃ taṃ ambaṃ mama maraṇaṃ āvahissatīti maññāmi. Mayhaṃ hi taṃ alabhantassa jīvitaṃ appavattissatīti. Upavasāmīti khuppipāsāhi upahato vasāmi. Rammaṃ paṭinisinnosmīti ramaṇīyaṃ nadiṃ paṭi ahaṃ nisinno. Puthulomāyutā puthūti ayaṃ nadī puthulomehi macchehi āyutā puthū vipulā api nāma me ito sotthi bhaveyyāti adhippāyo. Apalāyinīti apalāyitvā. Mama sammukhā ṭhiteti taṃ devataṃ ālapati. Apalāminītipi pāṭho. Malāparahite anavajjasarīreti attho. Kissa vāti kissa vā kāraṇena idhāgamāsīti pucchati. Rūpapaṭṭaplamatthīvāti puthupālimatthakāñcanapattasadisī. Byagghīvāti līlāvilāsena taruṇabyaggharājapotikā viya. Devānanti channaṃ kāmāvacaradevānaṃ. Yā vā manussalokasminti Yā vā manussaloke. Rūpenanvāgatitthiyoti rūpena anvāgatā itthiyo. Natthīti attano sambhāvanāya evamāha. Tava rūpasadisāya nāma na bhavitabbanti hissa adhippāyo. Gandhabbamānuseti mūlagandhādinissitesu gandhabbesu ca manussaloke ca. Cārupubbaṅgīti cārunā pubbaṅgena ūrulakkhaṇena samannāgate. Nāmañca bandhaveti attano nāmagottañca bandhave ca mayhaṃ akkhāhīti vadati.