ye vāpi isayo loke saññatattā tapassino

asaṃsayante jānanti paṭṭhabhūtā yasassinoti.

Tattha kosikinti yaṃ tvaṃ brāhmaṇa rammaṃ kosikigaṅgaṃ paṭinisinnosi. Bhūsālayā vutthāti bhūse caṇḍasote ālayo yassa vimānassa tasmiṃ adhivatthā. Gaṅgaṭṭhakavimānavāsinīti attho. Varavārivahoghavāti varavārivahena oghena samannāgatā. Sammukhāti vuttappakārā girikandarā maṃ sammukhaṃ karonti ahaṃ tāsaṃ pāmokkhā homīti dasseti. Abhisandantīti pavattanti. Tato tato āgantvā maṃ kosikigaṅgaṃ pavisantīti attho. Vanatodāti na kevalaṃ kandarāva athakho bahū vanatodā tamhā vanamhā udakānipi bahūni pavisanti. Nīlavārivahindharāti maṇivaṇṇena nīlena vārinā yutte udakakkhandhasaṅkhāte vahe dhārentiyo. Nāgacittodāti nāgānaṃ cittakārena vaṇṇasaṅkhātena udakena samannāgatā. Vārināti evarūpā hi bahū nadiyo maṃ vārināva abhisandanti paripūrentīti dasseti. Tāti tā nadiyo. Āvahantīti etāni ambādīni ākaḍḍhanti. Sabbāni hi etāni upayogatthe paccattavacanāni. Athavā tāti upayogabahuvacanaṃ. Āvahantīti imāni ambādīni tā nadiyo ākaḍḍhanti upagacchantīti attho. Evaṃ upagatāni pana mama sotaṃ pavisantīti adhippāyo. Sotassāti yaṃ ubhato tīre jātarukkhehi phalaṃ ambuni patati sabbaṃ taṃ mama sotasseva vasānugataṃ hoti natthettha saṃsayoti. Evaṃ Ambapakkassa nadīsotena āgamanakāraṇaṃ kathesi. Medhāvī puthupaññāti ubhayaṃ ālapanameva. Mā rocayāti evaṃ taṇhābhisaṅgaṃ mā rocaya. Paṭisedhāti paṭisedhehi. Tanti rājānaṃ ovadati. Vuddhavanti paññāvuddhabhāvaṃ paṇḍitabhāvaṃ. Raṭṭhābhivaḍḍhanāti raṭṭhassa abhivaḍḍhana. Ācayamānoti maṃsalohitena āciyanto vuddhanto taruṇova hutvāti attho. Rājisīti taṃ ālapati. Idaṃ vuttaṃ hoti yaṃ tvaṃ nirāhāratāya sussamāno taruṇova samāno ambalobhena maraṇaṃ abhikaṅkhasi na ve ahaṃ tava idaṃ paṇḍitabhāvaṃ maññāmīti. Tassāti yo puggalo taṇhāvasiko hoti tassa taṇhāvasikabhāvaṃ. Pitaroti saṅkhaṃ gatā brahmāno ca saddhiṃ kāmāvacaradevehi gandhabbā ca vuttappakārā dibbacakkhukā isayo ca asaṃsayaṃ jānanti. Anacchariyañcetaṃ yante iddhimanto jāneyyuṃ asuko nāma taṇhāvasiko hotīti puna tesaṃ bhāsamānānaṃ vacanaṃ sutvā yepi tesaṃ paṭṭhabhūtā yasassino paricārakā tepi jānanti pāpakammaṃ karontassa hi raho nāma natthīti tāpasassa saṃvegaṃ uppādentī evamāha.