Atīte ekasmiṃ araññāyatane bodhisatto aññataraṃ padumasaraṃ nissāya ṭhite rukkhe rukkhadevatā hutvā nibbatti. Tadā aññatarasmiṃ nātimahante sare nidāghasamaye udakaṃ mandaṃ ahosi bahū cettha macchā honti. Atheko bako macche disvā ekenupāyeneva ime macche vañcetvā khādissāmīti gantvā udakapariyante cintento nisīdi. Atha naṃ macchā disvā kiṃ ayya cintento nisinnosīti pucchiṃsu. Tumhākaṃ cintento nisinnomhīti. Amhākaṃ cintesi ayyāti. Imasmiṃ sare udakaṃ parittaṃ gocaro ca mando nidāgho ca mahanto idānime macchā kinnāma karissantīti tumhākaṃ cintento nisinnomhīti. Atha kiṃ karoma ayyāti. Sace mayhaṃ vacanaṃ kareyyātha ahaṃ vo ekekaṃ mukhatuṇḍakena gahetvā ekaṃ pañcavaṇṇapadumasañchannaṃ mahāsaraṃ netvā vissajjeyyanti. Ayya paṭhamakappato paṭṭhāya macchānaṃ cintanabako nāma natthi tvaṃ amhesu ekekaṃ khāditukāmosa na mayaṃ tuyhaṃ saddahāmāti. Nāhaṃ khādissāmi sace pana sarassa atthibhāvaṃ mayhaṃ na saddahatha ekaṃ macchaṃ mayā saddhiṃ saraṃ passituṃ pesethāti āha. Macchā tassa saddahitvā ayaṃ jalepi thalepi samatthoti ekaṃ kāḷamahāmacchaṃ adaṃsu imaṃ gahetvā gacchathāti. So taṃ gahetvā netvā sare vissajjetvā sabbaṃ saraṃ dassetvā puna ānetvā tesaṃ macchānaṃ santike vissajjesi. So tesaṃ macchānaṃ sarassa sampattiṃ vaṇṇesi. Te tassa kathaṃ sutvā gantukāmā hutvā Sādhu ayya amhe gaṇhitvā gacchāhīti āhaṃsu. Bako paṭhamaṃ taṃ kāḷamahāmacchameva gahetvā saratīraṃ netvā saraṃ dassetvā saratīre jātavaruṇarukkhe nilīyitvā taṃ viṭapantare pakkhipitvā tuṇḍena vijjhanto jīvitakkhayaṃ pāpetvā maṃsaṃ khāditvā kaṇṭake rukkhamūle pātetvā puna gantvā vissaṭṭho me so maccho añño āgacchatūti etenupāyena ekekaṃ gahetvā sabbe macche khāditvā puna āgato ekaṃ macchaṃpi nāddasa. Eko panettha kakkaṭako avasiṭṭho. Bako tampi khāditukāmo hutvā bho kakkaṭaka mayā sabbe te macchā netvā padumasañchanne mahāsare vissajjitā ehi tampi nessāmīti. Maṃ gahetvā gacchanto kathaṃ gaṇhissasīti. Ḍaṃsitvā gaṇhissāmīti. Tvaṃ evaṃ gahetvā gacchanto maṃ pātessasi nāhaṃ tayā saddhiṃ gamissāmīti. Mā bhāyi ahaṃ taṃ sugahitaṃ gahetvā gamissāmīti. Kakkaṭako cintesi imassa macche gahetvā sare vissajjanannāma natthi sace pana maṃ sare vissajjessati iccetaṃ kusalaṃ no ce vissajjessati gīvamassa chinditvā jīvitaṃ harissāmīti. Atha naṃ evamāha samma baka na kho maṃ sugahitaṃ gahetuṃ sakkhissasi amhākampana gahaṇaṃ sugahaṇaṃ sacāhaṃ aḷena tava gīvaṃ gahetuṃ labhissāmi tava gīvaṃ sugahitaṃ katvā tayā saddhiṃ gamissāmīti. So taṃ vañcetukāmo esa manti ajānanto sādhūti sampaṭicchi. Kakkaṭako attano aḷehi kammārasaṇḍāsena viya tassa gīvaṃ sugahitaṃ katvā idāni gacchāhīti āha. So taṃ netvā saraṃ dassetvā varuṇarukkhābhimukho Pāyāsi. Kakkaṭako āha mātula ayaṃ saro etto tvaṃ pana ito nesīti. Bako piyamātulo ahaṃ na bhaginiputtosi vata me tvanti vatvā tvaṃ esa maṃ ukkhipitvā vicaranto mayhaṃ dāsoti saññaṃ karosi maññe passetaṃ varuṇarukkhamūle kaṇṭakarāsiṃ yathā cete sabbe macchā khāditā tampi tatheva khādissāmīti āha. Kakkaṭako ete macchā attano bālatāya tayā khāditā ahampana te me khādituṃ na dassāmi taññeva pana vināsaṃ pāpessāmi tvaṃ hi bālatāya mayā vañcitabhāvaṃ na jānāsi marantā ubhopi marissāma esa te sīsaṃ chinditvā bhūmiyaṃ khipissāmīti vatvā saṇḍāsena viya aḷena tassa gīvaṃ nippīḷesi. So vivaṭena mukhena akkhīhi assunā paggharantena maraṇabhayatajjito sāmi ahaṃ taṃ na khādissāmi jīvitaṃ me dehīti āha. Yadi evaṃ otaritvā maṃ sarasmiṃ vissajjehīti. So nivattitvā sarameva otaritvā kakkaṭakaṃ sarapariyante paṅkapiṭṭhe ṭhapesi. Kakkaṭako kattarikāya kumudanāḷaṃ kappento viya tassa gīvaṃ kappetvā udakaṃ pāvisi. Taṃ acchariyaṃ disvā varuṇarukkhe adhivatthā devatā vanaṃ unnādayamānā sādhukāraṃ dadamānā madhurassarena imaṃ gāthamāha