maññe sovaṇṇayo rāsi sovaṇṇamālā ca nandako

yattha dāso āmajāto ṭhito thullāni gajjatīti.

Tattha maññeti evaṃ ahaṃ jānāmi. Sovaṇṇayoti sundaro Vaṇṇo etesanti suvaṇṇāni. Kāni tāni. Rajatamaṇikāñcanapavāḷādīni ratanāni. Imasmiṃ hi ṭhāne sabbānetāni suvaṇṇānīti adhippetāni. Tesaṃ rāsi sovaṇṇayo rāsi. Sovaṇṇamālā cāti tuyhaṃ pitu santakā suvaṇṇamālāpi ca etthevāti maññāmi. Nandako yattha dāsoti yasmiṃ ṭhāne ṭhito nandako dāso. Āmajātoti āma ahaṃ vo dāsīti evaṃ dāsabyaṃ upagatāya āmadāsīsaṅkhātāya dāsiyā putto. Ṭhito thullāni gajjatīti so yasmiṃ ṭhāne ṭhito thullāni pharusavacanāni vadati tattheva te kuladhanaṃ evamahantaṃ maññāmīti bodhisatto kumārassa dhanagahaṇupāyaṃ ācikkhi.

Kumāro bodhisattaṃ vanditvā gharaṃ gantvā nandaṃ ādāya nidhiṭṭhānaṃ gantvā yathānusiṭṭhaṃ paṭipajjitvā taṃ dhanaṃ āharitvā kuṭumbaṃ saṇṭhapetvā bodhisattassa ovāde ṭhatvā dānādīni puññāni katvā jīvitapariyosāne yathākammaṃ gato.