lūkhāya aloṇikāya ca

passa phalaṃ kummāsapiṇḍiyāti.

Aparampi āha gahapati tvaṃ tāva lūkhaṃ dānaṃ dadamāno Aṭṭhannaṃ ariyapuggalānaṃ desi ahaṃ velāmakāle sakalajambūdīpaṃ unnaṅgalaṃ katvā satta ratanāni dadamāno pañca mahānadiyo ekoghapuṇṇaṃ katvā viya ca mahādānaṃ pavattayamāno tisaraṇagataṃ vā pañcasīlarakkhakaṃ vā kañci nālatthaṃ dakkhiṇeyyapuggalā nāma evaṃ dullabhā tasmā lūkhaṃ me dānanti mā cittaṃ saṅkopayitthāti evañca pana vatvā velāmasuttaṃ kathesi.

Atha kho sā devatā issarakāle seṭṭhinā saddhiṃ kathetuṃ asakkontī idānāyaṃ duggatattā mama vacanaṃ gaṇhissatīti maññamānā aḍḍharattikasamaye sirigabbhaṃ pavisitvā obhāsaṃ pharitvā ākāse aṭṭhāsi. Seṭṭhī taṃ disvā ko esoti āha. Ahaṃ mahāseṭṭhi catutthadvārakoṭṭhake adhivatthā devatāti. Kimatthaṃ āgatāsīti. Tuyhaṃ ovādaṃ kathetukāmā hutvā āgatāti. Tenahi kathehīti. Mahāseṭṭhi tvaṃ pacchimakālaṃ na cintesi puttadhītaro na olokesi samaṇassa gotamassa sāsane bahudhanaṃ vippakiṇṇaṃ so tvaṃ ativelaṃ dhanavissajjanena vā vaṇijjakammantānaṃ akaraṇena vā samaṇaṃ gotamaṃ nissāya duggato jāto evaṃbhūtopi samaṇaṃ gotamaṃ na muñcasi ajjāpi te samaṇā gharaṃ pavisantiyeva tehi nīhaṭaṃ na sakkā paccāharāpetuṃ gahitameva hoti ito paṭṭhāya pana sayañca samaṇassa gotamassa santikaṃ mā gamittha sāvakānañcassa imaṃ gharaṃ pavisituṃ mā adāsi samaṇaṃ gotamaṃ nivattitvāpi anolokento attano vohāre ca vaṇijjañca katvā kuṭumbaṃ saṇṭhapehīti. Atha naṃ so evamāha ayaṃ tayā mayhaṃ dātabbo ovādoti. Āma ayanti. Tādisānaṃ devatānaṃ satenapi sahassenapi satasahassenapi akampanīyo ahaṃ dasabalena kato mama ca saddhā sineru viya acalā supatiṭṭhitā mayā niyyānike ratanasāsane dhanaṃ vissajjitaṃ ayuttaṃ te kathitaṃ buddhasāsane pahāro dinno evarūpāya anācārāya dussīlāya kālakaṇṇiyā saddhiṃ tayā mama ekagehe vasanakiccaṃ natthi sīghaṃ mama gehā nikkhamitvā aññattha gacchāti. Sā sotāpannassa ariyasāvakassa vacanaṃ sutvā ṭhātuṃ asakkontī attano vasanaṭṭhānaṃ gantvā dārake hatthena gahetvā nikkhami nikkhamitvā ca pana aññattha vasanaṭṭhānaṃ alabhamānā seṭṭhiṃ khamāpetvā tattheva vasissāmīti nagarapariggāhakadevaputtassa santikaṃ gantvā taṃ vanditvā aṭṭhāsi kenatthena āgatāsīti ca vuttā ahaṃ sāmi anupadhāretvā anāthapiṇḍikena saddhiṃ kathesiṃ so maṃ kujjhitvā vasanaṭṭhānā nikkaḍḍhi maṃ seṭṭhissa santikaṃ netvā khamāpetvā vasanaṭṭhānaṃ me dethāti. Kiṃ pana tayā seṭṭhī vuttoti. Sāmi ito paṭṭhāya buddhupaṭṭhānaṃ saṅghupaṭṭhānaṃ mā kari samaṇassa gotamassa ghare pavesanaṃ mā adāsīti evaṃ me vutto sāmīti. Ayuttaṃ tayā vuttaṃ sāsane pahāro dinno ahaṃ taṃ ādāya seṭṭhino santikaṃ gantuṃ na ussahāmīti. Sā tassa santikā saṅgahaṃ alabhitvā catunnaṃ mahārājānaṃ santikaṃ agamāsi tehipi tatheva paṭikkhittā sakkaṃ devarājaṃ upasaṅkamitvā taṃ pavutta ācikkhitvā ahaṃ devarāja Vasanaṭṭhānaṃ alabhamānā dārake hatthena gahetvā anāthā vicarāmi tumhākaṃ siriyā mayhaṃ vasanaṭṭhānaṃ dāpethāti suṭṭhutaraṃ yāci. Sopi taṃ āha tayā ayuttaṃ kataṃ jinasāsane pahāro dinno ahampi taṃ nissāya seṭṭhinā saddhiṃ kathetuṃ na sakkomi ekampana te seṭṭhissa khamanupāyaṃ kathessāmīti. Sādhu deva kathehīti. Mahāseṭṭhissa hatthato manussehi paṇṇaṃ āropetvā aṭṭhārasakoṭisaṅkhyaṃ dhanaṃ gahitaṃ atthi tvaṃ tassa āyuttakavesaṃ gahetvā kañci ajānāpetvā tāni paṇṇāni ādāya katipayehi yakkhataruṇehi parivārito ekena hatthena paṇṇaṃ ekena lekhaṃ gahetvā tesaṃ gehaṃ gantvā gehamajjhe ṭhitā attano yakkhānubhāvena te uttāsetvā imaṃ tumhākaṃ iṇapaṇṇaṃ passatha amhākaṃ seṭṭhī attano issarakāle tumhe na kiñci āha idāni duggato jāto tumhehi gahitakahāpaṇe dethāti vatvā attano yakkhānubhāvaṃ dassetvā sabbāpi aṭṭhārasa hiraññakoṭiyo sodhetvā seṭṭhissa tucchakoṭṭhe pūretvā aññaṃ aciravatīnadītīre nidahitadhanaṃ nadīkūle bhinne samuddaṃ paviṭṭhakaṃ atthi tampi attano ānubhāvena āharitvā koṭṭhe pūretvā aññampi asukaṭṭhāne nāma assāmikaṃ aṭṭhārasakoṭimattaṃ dhanaṃ atthi tampi āharitvā tucchakoṭṭhe pūrehi imāhi catuppaññāsakoṭīhi imaṃ tucchakoṭṭhapūraṇaṃ daṇḍakammaṃ katvā mahāseṭṭhiṃ khamāpehīti.