Tattha rajjanti ācariya mayaṃ imasmiṃ sattayojanike indapattanagare rajjañca tiyojanasatike kururaṭṭhe issarabhāvasaṅkhātaṃ ādhipaccañca. Paṭipannāti adhigatā. Mahantanti idāni mahantabhāvaṃ pattumicchāmi. Vijetunti imaṃ paṭhaviṃ dhammena abhibhavituṃ ajjhottharituṃ icchāmi. Kiccovāti avasesajanehi raññova dhammo kicco karaṇīyataro. Rājānuvattako hi loko so tasmiṃ dhammike sabbopi dhammiko hoti tasmā esa dhammo nāma raññova kiccoti. Idha cevāninditāti yena mayaṃ idha loke ca paraloke Ca aninditā. Yena pappemūti yena mayaṃ nirayādīsu anibbattitvā devesu ca mānusesu ca yasaṃ issariyaṃ sobhaggappattaṃ pāpuṇeyyāma taṃ no kāraṇaṃ kathehīti. Yohanti brāhmaṇa yo ahaṃ phalavipākasaṅkhātaṃ atthañca tassa atthassa hetubhūtaṃ dhammañca kattuṃ samādāya vattituṃ uppādetuñca icchāmi. Taṃ tvanti tassa mayhaṃ tvaṃ sukheneva nibbānagāmimaggaṃ āruyha appaṭisandhikabhāvaṃ patthentassa taṃ atthañca dhammañca pucchito akkhāhi pākaṭaṃ katvā kathehīti brāhmaṇaṃ dhammayāgapañhaṃ pucchi.

Ayaṃ pana pañho gambhīro buddhavisayo sabbaññubuddhameva taṃ pucchituṃ yuttaṃ tasmiṃ asati sabbaññutapariyesakaṃ bodhisattaṃ pucchituṃ vaṭṭatīti. Sucīrato pana attano abodhisattatāya pañhaṃ kathetuṃ nāsakkhi. Asakkonto ca paṇḍitamānaṃ akatvā attano asamatthabhāvaṃ kathento gāthamāha

nāññatra vidhurā rāja etaṃ akkhātumarahati

yaṃ tvaṃ atthañca dhammañca kattumicchasi khattiyāti.