pucchitvā sambhavaṃ jaññā atthaṃ dhammañca brāhmaṇāti.

Tattha jaññāti jānissasi. Candoti puṇṇacando. Vimaloti abbhādimalarahito. Evampi daharūpetoti evaṃ sambhavakumāro daharabhāvena upetopi paññāyogena sakalajambūdīpatale avasesapaṇḍite atirocati atikkamitvā virocati bhāsati. Rammakoti cittamāso. Atevaññehīti ativiya aññehi ekādasahi māsehi. Evanti evaṃ sambhavopi paññāyogena sobhati. Himavāti himapātasamaye himayuttoti himavāti gimhakāle himañca vamatīti himavāti. Sampattaṃ janaṃ gandhena madayatīti gandhamādano. Mahābhūtagaṇālayoti devagaṇanivāso. Disā bhātīti sabbadisā ekobhāsā viya karoti. Pavātīti gandhena sabbā disā vāyati. Evanti evaṃ sambhavopi paññāyogena sabbā disā bhāti ceva pavāti ca. Yasassimāti tejasampattiyā yasassimā. Accimālīti accīhi yutto. Jalamāno vane gaccheti gacchasaṅkhāte mahāvane jalanto carati. Analoti atitto. Gatamaggassa kaṇhabhāvena kaṇhavattanī. Yaññe āhutivasena ghaṭaṃ asnātīti ghaṭāsano. Dhūmo ketukiccaṃ assa sādhetīti dhūmaketu. Uttamāhevanandahoti ahevanaṃ vuccati vanasaṇḍo uttamavanasaṇḍaṃ dahatīti Attho. Nissiveti rattibhāge. Pabbataggasminti pabbatasikhare. Bahutejoti bahuindano. Virocatīti sabbā disā obhāsati. Evanti evaṃ mama kaniṭṭho sambhavakumāro daharopi paññāyogena virocati. Bhadranti bhadramassājānīyaṃ javasampattiyā jānanti na sarīrena. Vāhiyeti vahitabbe bhāre sati bhāravahatāya ayaṃ uttamoti balibaddaṃ jānanti. Dohenāti dohasampattiyā dhenuṃ sukhīrāti jānanti. Bhāsamānanti ettha nānābhāsamānaṃ jānanti. Missaṃ bālehi paṇḍitanti suttaṃ āharitabbaṃ.

Sucīrato evaṃ tasmiṃ sambhavaṃ vaṇṇente pañhaṃ pucchitvā jānissāmīti kahaṃ pana te kumāra kaniṭṭhoti pucchi. Athassa so sīhapañjaraṃ vivaritvā hatthaṃ pasāretvā so eso pāsādadvāre antaravīthiyaṃ kumārakehi saddhiṃ suvaṇṇavaṇṇo kīḷati ayaṃ mama kaniṭṭho upasaṅkamitvā taṃ pucchatha buddhalīlāya te pañhaṃ kathessatīti āha. Sucīrato tassa vacanaṃ sutvāva pāsādā oruyha kumārassa santikaṃ agamāsi. Kāya velāyāti. Kumārassa nivatthasāṭakaṃ mocetvā khandhe khipitvā ubhohi hatthehi paṃsuṃ gahetvā ṭhitavelāya.