uppajjitvā nirujjhanti tesaṃ vūpasamo sukhoti evaṃ vibhāvitaṃ aniccataṃ kathesi. Kummagganti brāhmaṇa yathā muḷho acetano andhabālaputhujjano dvāsaṭṭhidiṭṭhigatasaṅkhātaṃ kummaggaṃ Sevati evaṃ tava rājā taṃ kummaggaṃ na seveyya niyyānikaṃ dasakusalakammapathamattameva sevatu evamassa vadeyyāsīti. Attānanti imaṃ sugatiyaṃ ṭhitaṃ attabhāvaṃ nātivatteyya yena kammena tisso kusalasampattiyo sabbakāmamagge atikkamitvā apāye nibbattanti taṃ kammaṃ na kareyyāti attho. Adhammanti tividhaduccaritasaṅkhātaṃ adhammaṃ na samācareyya. Atittheti dvāsaṭṭhidiṭṭhisaṅkhāte atitthe nappatāreyya na otāreyya. Na tāreyyātipi pāṭho. Attano diṭṭhānugatiṃ āpajjantaṃ janaṃ otāreyya. Anattheti akāraṇe. Na yutoti yuttapayutto na siyā. Brāhmaṇa yadi te rājā dhammayāgapañhe vattitukāmo imasmiṃ ovāde vattatūti tassa katheyyāsīti ayamettha adhippāyo. Sadāti satataṃ. Idaṃ vuttaṃ hoti yo khattiyo etāni kāraṇāni kātuṃ jānāti so rājā sukkapakkhe cando viya sadā vaḍḍhati. Virocatīti mittāmaccānaṃ majjhe attano sīlācārañāṇādīhi guṇehi sobhati virocatīti.

Evaṃ mahāsatto gaganatale candaṃ uṭṭhāpento viya buddhalīlāya brāhmaṇassa pañhaṃ kathesi. Mahājano nadanto selento appoṭhento sādhukārasahassāni akāsi celukkhepe ceva aṅgulipoṭhe ca pavattesi hatthapilandhanādīni khipi. Evaṃ khittadhanaṃ koṭippattaṃ ahosi. Rājāpissa tuṭṭho mahantaṃ yasaṃ adāsi. Sucīratopi nikkhasahassena pūjaṃ katvā suvaṇṇapaṭṭe jātihiṅgulakena pañhavisajjanaṃ likhitvā indapattanagaraṃ gantvā rañño dhammayāgapañhaṃ kathesi. Rājā tasmiṃ dhamme vattitvā saggapūraṃ pūresi.

Satthā imaṃ dhammadesanaṃ āharitvā na bhikkhave idāneva pubbepi tathāgato mahāpaññoyevāti vatvā jātakaṃ samodhānesi tadā dhanañjayarājā ānando ahosi sucīrato anuruddho vidhuro ariyakassapo bhadrakāro moggallāno sañjayamāṇavo sārīputto sambhavapaṇḍito ahamevāti.

Sambhavajātakaṃ niṭṭhitaṃ.