Atha naṃ dhammasenāpati sāvatthiyaṃ piṇḍāya caramāno disvā ayaṃ satto atikāruññappatto kataragāmavāsiko nu khoti tasmiṃ mettacittaṃ vaḍḍhetvā ehi reti āha. So āgantvā theraṃ vanditvā aṭṭhāsi. Atha naṃ thero kataragāmavāsikosi kahaṃ vā te mātāpitaroti pucchi. Ahaṃ bhante nippaccayo mayhaṃ mātāpitaro taṃ nissāya kilantamhāti maṃ chaḍḍetvā palātāti. Apica pana pabbajissasīti. Bhante ahaṃ tāva pabbajeyyaṃ mādisaṃ pana kapaṇaṃ ko pabbājessatīti. Thero āha ahaṃ pabbājessāmīti. Sādhu bhante pabbājetha manti. Thero tassa khādanīyaṃ bhojanīyaṃ datvā taṃ vihāraṃ netvā sahattheneva nhāpetvā pabbājetvā paripuṇṇavassaṃ Upasampādesi. So mahallakakāle losakatissattheroti paññāyittha nippuñño appalābho. Tena kira asadisadānepi kucchipūro na laddhapubbo jīvitaghaṭanamattakameva labbhati. Tassa hi patte ekasmiññeva yāguuluṅke dinne patto samatittiko viya hutvā paññāyati. Atha manussā imassa patto pūroti heṭṭhā yāguṃ denti. Tassa patte yāgudānakāle manussānaṃ bhājane yāgu antaradhāyatītipi vadanti. Jajjakādīsupi eseva nayo. So aparena samayena vipassanaṃ vaḍḍhetvā aggaphale arahatte patiṭṭhitopi appalābho ahosi. Athassa anupubbena āyusaṅkhāresu parihīnesu parinibbānadivaso sampāpuṇi.

Dhammasenāpati āvajjento tassa parinibbānabhāvaṃ ñatvā ayaṃ losakatissatthero ajja parinibbāyissati ajja mayā etassa yāvadatthaṃ āhāraṃ dātuṃ vaṭṭatīti taṃ ādāya sāvatthiṃ piṇḍāya pāvisi. Thero taṃ nissāya tāva bahumanussāya sāvatthiyā hatthaṃ pasāretvā vandanamattampi nālattha. Atha naṃ thero gacchāvuso āsanasālāyaṃ nisīdāti uyyojesi. Tato āgatameva manussā ayyo āgatoti āsane nisīdāpetvā bhojenti. Theropi imaṃ bhattaṃ losakatissattherassa dethāti laddhāhāraṃ pesesi. Taṃ gahetvā gatā losakatissattheraṃ assaritvā sayameva bhuñjiṃsu. Atha therassa uṭṭhāya vihāraṃ gamanakāle losakatissatthero gantvā theraṃ vandi. Thero nivattitvā ṭhitakova laddhante āvuso bhattanti pucchi. Labhissāma no bhanteti. Thero saṃvegappatto kālaṃ olokesi. Kālo anatikkanto. Thero hotāvuso idheva nisīdāti losakatissattheraṃ āsanasālāyaṃ nisīdāpetvā kosalarañño nivesanaṃ agamāsi. Rājā therassa pattaṃ gāhāpetvā bhattassa akāloti pattapūraṃ catummadhuraṃ dāpesi. Thero taṃ ādāya gantvā ehāvuso tissa imaṃ catummadhuraṃ paribhuñjāti vatvā pattaṃ gahetvāva aṭṭhāsi. So therassa gāravena lajjito na paribhuñjati. Atha naṃ thero ehāvuso tissa ahaṃ pattaṃ gahetvāva ṭhassāmi tvaṃ nisīditavā paribhuñja sace ahaṃ pattaṃ hatthato muñceyyaṃ kiñci na bhaveyyāti āha. Athāyasmā losakatissatthero aggasāvake dhammasenāpatimhi pattaṃ gahetvā ṭhite catummadhuraṃ paribhuñji. Taṃ therassa ariyiddhibalena na parikkhayaṃ agamāsi. Tadā losakatissatthero yāvadatthaṃ udarapūraṃ katvā paribhuñji taṃ divasameva anupādisesāya nibbānadhātuyā parinibbāyi. Sammāsambuddho tassa santike ṭhatvā sarīranikkhepaṃ kāresi. Dhātuyo gahetvā cetiyaṃ kariṃsu.