So kuṭumbiko nevāsikattheraṃ sappimadhusakkarābhisaṅkhataṃ pāyāsaṃ bhojetvā pattaṃ gandhacuṇṇehi ubbattetvā pūretvā bhante so thero maggakilanto bhavissati idamassa harathāti adāsi. Itaro appaṭikkhipitvāva gahetvā gacchanto sace so bhikkhu imaṃ pāyāsaṃ labhissati gīvāyaṃ gahetvā nikkaḍḍhiyamānopi na gamissati sace Panāhaṃ imaṃ pāyāsaṃ manussassa dassāmi pākaṭaṃ me kammaṃ bhavissati sace udake opilāpessāmi udakapiṭṭhe sappi paññāyissati sace bhūmiyaṃ chaḍḍessāmi kākasannipātena paññāyissati kasmiṃ nu kho imaṃ chaḍḍeyyanti upadhārento ekaṃ jhāmakkhettaṃ disvā aṅgāraṃ viyūhitvā tattha pakkhipitvā upari aṅgārehi paṭicchādetvā vihāraṃ gato taṃ bhikkhuṃ adisvā cintesi addhā so bhikkhu khīṇāsavo mama ajjhāsayaṃ viditvā aññattha gato bhavissati aho mayā udarahetu ayuttaṃ katanti. Tāvadevassa mahantaṃ domanassaṃ udapādi. Tato paṭṭhāyeva manussapeto hutvā nacirasseva kālaṃ katvā niraye nibbatti.

So bahūni vassasatasahassāni niraye pacitvā pakkāvasesena paṭipāṭiyā pañca jātisatāni yakkho hutvā ekadivasaṃpi udarapūraṃ āhāraṃ na labhati ekadivasampana gabbhamalaṃ udarapūraṃ labhi. Pañca jātisatāni sunakho ahosi tadāpi ekadivasaṃ bhattavamanaṃ udarapūraṃ labhi. Sesakāle pana tena udarapūro āhāro nāma na laddhapubbo. Sunakhayonito pana cavitvā kāsīraṭṭhe ekasmiṃ duggatakule nibbatti. Tassa nibbattito paṭṭhāya taṃ kulaṃ pana paramaduggatameva jātaṃ. Nābhito uddhaṃ udakakañjikamattampi na labhi. Tassa pana mittabindukoti nāmaṃ ahosi. Mātāpitaro chātakadukkhaṃ adhivāsetuṃ asakkontā gaccha kāḷakaṇṇīti taṃ pothetvā nīhariṃsu. So appaṭisaraṇo vicaranto bārāṇasiṃ agamāsi. Tadā bodhisatto bārāṇasiyaṃ disāpāmokkho ācariyo hutvā pañcamāṇavakasatānaṃ sippaṃ vācesi. Tadā bārāṇasīvāsino duggatānaṃ paribbayaṃ datvā sippaṃ sikkhāpenti. Ayampi mittabinduko bodhisattassa santike sippaṃ sikkhati. So pharuso anovādakkhamo taṃ taṃ paharanto vicarati bodhisattena ovādiyamānopi ovādaṃ na gaṇhāti. Taṃ nissāya āyopissa mando jāto. Atha so māṇavakehi saddhiṃ bhaṇḍitvā ovādaṃ agaṇhanto palāyitvā āhiṇḍanto ekaṃ paccantagāmaṃ gantvā bhatiṃ katvā jīvati. So tattha ekāya duggatitthiyā saddhiṃ saṃvāsaṃ kappesi. Sā taṃ nissāya dve dārake vijāyi. Gāmavāsino amhākaṃ susāsanaṃ dussāsanaṃ āroceyyāsīti mittabindukassa bhatiṃ datvā taṃ gāmadvāre kuṭiyā vasāpesuṃ. Tampana mittabindukaṃ nissāya te paccantagāmavāsino sattakkhattuṃ rājadaṇḍaṃ agamaṃsu. Sattakkhattuṃ tesaṃ gehāni jhāyiṃsu. Sattakkhattuṃ taḷākaṃ bhijji. Te cintayiṃsu amhākaṃ pubbe imassa mittabindukassa anāgamanakāle evarūpaṃ natthi idāni panassa āgatakālato paṭṭhāya parihāyāmāti taṃ pothetvā nīhariṃsu. So attano dārake gahetvā aññattha gacchanto ekaṃ amanussapariggahitaṃ aṭaviṃ pāvisi. Tatthassa amanussā dve dārake ca bhariyañca māretvā maṃsaṃ khādiṃsu.