So tato palāyitvā tato tato āhiṇḍanto ekaṃ gambhīraṃ nāma paṭṭanagāmaṃ nāvāvissajjanadivaseyeva patvā kammakaro hutvā nāvaṃ abhiruhi. Nāvā samuddapiṭṭhe sattāhaṃ gantvā sattame divase samuddamajjhe ākoṭetvā ṭhapitā viya aṭṭhāsi. Te kāḷakaṇṇisalākaṃ Vicāresuṃ. Sattakkhattuṃ mittabindukasseva pāpuṇi. Manussā tassekaṃ veḷukalāpakaṃ datvā hatthe gahetvā samudde khipiṃsu.
Tasmiṃ khittamatte nāvā agamāsi. Mittabinduko veḷukalāpe nipajjitvā samuddapiṭṭhe gacchanto kassapasammāsambuddhakāle rakkhitasīlassa phalena samuddapiṭṭhe ekasmiṃ phalikavimāne catasso devadhītaro paṭilabhitvā tāsaṃ santike sukhaṃ anubhavamāno sattāhaṃ vasi. Tā pana vimānapetiyo sattāhaṃ sukhaṃ anubhavanti. Sattāhaṃ dukkhaṃ anubhavituṃ gacchamāno yāva mayaṃ āgacchāma tāva idheva hohīti vatvā agamaṃsu. Mittabinduko tāsaṃ gatakāle veḷukalāpe nipajjitvā purato gacchanto rajatavimāne aṭṭha devadhītaro labhi tatopi aparaṃ gacchanto maṇivimāne soḷasa kanakavimāne dvattiṃsa devadhītaro labhi tāsaṃpi vacanaṃ akatvā purato gacchanto antaradīpake ekaṃ yakkhanagaraṃ addasa. Tatthekā yakkhinī ajarūpena vicarati. Mittabinduko tassā yakkhinībhāvaṃ ajānanto ajamaṃsaṃ khādissāmīti taṃ pāde aggahesi. Sā yakkhānubhāvena taṃ ukkhipitvā khipi. So tāya khitto samuddamatthakena gantvā bārāṇasiyaṃ parikkhāpiṭṭhe ekasmiṃ kaṇṭakagumbamatthake patitvā pavattamāno bhūmiyaṃ patiṭṭhāsi. Tasmiñca samaye tasmiṃ parikkhāpiṭṭhe rañño ajikā caramānā corā haranti. Ajikagopakā core gaṇhissāmāti ekamantaṃ nilīnā aṭṭhaṃsu. Mittabinduko pavattitvā bhūmiyaṃ ṭhito tā ajikā disvā cintesi ahaṃ samudde ekasmiṃ dīpake ekaṃ pāde gahetvā tāya khitto idha Patito sace idāni ekaṃ pāde gahessāmi sā maṃ parato samuddapiṭṭhe vimānadevatānaṃ santike khipissatīti. So evaṃ ayoniso manasikaritvā ajikaṃ pāde gaṇhi. Sāpi gahitamattā viravi. Ajikagopakā ito cito ca āgantvā ettakaṃ kālaṃ rājakule ajikāya khādako esa coroti taṃ koṭṭetvā bandhitvā rañño santikaṃ nenti. Tasmiṃ khaṇe bodhisatto pañcasatamāṇavaparivuto nagarā nikkhamma nhāyituṃ gacchanto mittabindukaṃ disvā sañjānitvā te manusse āha tātā ayaṃ amhākaṃ antevāsiko kasmā naṃ gaṇhathāti. Ajikacorako ayya ekaṃ ajikaṃ pāde gaṇhi tasmā gahitoti. Tenahetaṃ amhākaṃ dāsaṃ katvā detha amhe nissāya jīvissatīti. Te sādhu ayyāti taṃ vissajjetvā agamaṃsu. Atha naṃ bodhisatto mittabindukaṃ tvaṃ ettakaṃ kālaṃ kahaṃ vasīti pucchi. So sabbaṃ attanā katakammaṃ ārocesi. Bodhisatto atthakāmānaṃ vacanaṃ akaronto evaṃ dukkhaṃ pāpuṇātīti vatvā imaṃ gāthamāha