Evaṃ tena therena ettake addhāne tīsuyeva attabhāvesu kucchipūro laddhapubbo yakkhena hutvā ekadivasaṃ gabbhamalaṃ laddhaṃ sunakhena hutvā ekadivasaṃ bhattavamanaṃ parinibbānadivase dhammasenāpatissānubhāvena catummadhuraṃ laddhaṃ evaṃ parassa lābhantarāyakaraṇaṃ nāma mahādosanti veditabbaṃ. Tasmiṃ pana kāle sopi ācariyo mittabindukopi yathākammaṃ gato.

Satthā evaṃ bhikkhave attano appalābhibhāvañca ariyadhammalābhibhāvañca sayameva eso akāsīti imaṃ dhammadesanaṃ āharitvā anusandhiṃ ghaṭetvā jātakaṃ samodhānesi tadā mittabinduko losakatissatthero ahosi disāpāmokkho ācariyo pana ahamevāti.

Losakajātakaṃ paṭhamaṃ.