Tattha niḍḍaṃ phalinasakuṇīvāti yathā sakuṇikā mukhatuṇḍakena gocaraṃ gahetvā kenaci upaddavena sakuṇapotakānaṃ phalinattā phalinasakuṇī niḍḍaṃ āgaccheyya yathā vā gatasiṅgaṃ nikkhantavacchikaṃ ālayaṃ suññaṃ vacchakasālaṃ vacchagiddhinī dhenu āgaccheyya evaṃ suññaṃ assamaṃ āgañchīti attho. Tadā hi sotthiseno sambulāya cirāyamānāya itthiyo nāma lolā paccāmittaṃpi me ādāya āgaccheyyāti parisaṅkanto paṇṇasālato nikkhamitvā gacchantaraṃ pavisitvā nisīdi. Tenetaṃ vuttaṃ utumattakkhāti sokavegasañjātena uṇhena utunā mandalocanā. Apassantīti tasmiṃ vane nāthaṃ attano patiṃ apassantī itocītoca sandhāvamānā paridevati. Tattha samaṇe brāhmaṇeti samitapāpabāhitapāpe samaṇe brāhmaṇe. Sampannacaraṇeti saha sīlena aṭṭhannaṃ samāpattīnaṃ vasena sampannacaraṇe ise ca vandeti. Evaṃ vatvā rājaputtaṃ apassantī tumhākaṃ saraṇaṃ gatamhi sace me sāmikassa nisinnaṭṭhānaṃ disvā jānātha ācikkhathāti paridevesīti attho. Sesagāthāsupi eseva nayo. Tiṇālatāni osadhyoti antopheggubahisāratiṇāni ca latāni ca antosāraosadhiyo ca. Imaṃ gāthaṃ tiṇādīsu nibbattā devatā sandhāyāha. Indivarīsāmanti indivarīpupphasamānavaṇṇaṃ. Tumhamhīti rattiṃ sandhāya taṃpi amhīti āha. Bhagirasinti evaṃ pariyāyanāmikaṃ gaṅgaṃ. Vasantīnanti aññesaṃ bahūnaṃ nadīnaṃ paṭiggahitagaṅgāya nibbattaṃ devataṃ sandhāyevamāha. Himavantepi eseva nayo.

Taṃ evaṃ paridevamānaṃ disvā sotthiseno cintesi ayaṃ ativiya paridevati na kho panassā bhāvaṃ jānāmi sace mayi sinehena evaṃ karoti hadayampissā phaleyya pariggaṇhissāmi tāva nanti gantvā paṇṇasāladvāre nisīdi. Sā paridevamānā paṇṇasāladvāraṃ gantvā tassa pāde vanditvā kuhiṃ gatosi devāti āha. Atha naṃ so bhadde tvaṃ aññesu divasesu imāya velāya na āgacchasi ajja atisāyaṃ āgatāsīti pucchanto gāthamāha

atisāyaṃ vatāgañchi rājaputtī yasassinī

kena nujja samāgañchi ko te piyataro mayāti.