Taṃ kammaṃ ettakaṃ kālaṃ okāsaṃ alabhitvā bhasmapaṭicchanno aggirāsi viya ṭhatvā imaṃ antimasarīraṃ upadhāvitvā gaṇhi. Yathā hi pana sunakhaluddakena migaṃ disvā sunakho visajjito migaṃ anubandhitvā yasmiṃ ṭhāne pāpuṇāti tasmiṃyeva gaṇhāti evaṃ idaṃ kammaṃ yasmiṃ ṭhāne okāsaṃ labhati tasmiṃ vipākaṃ deti. Tena mutto nāma natthi. Thero attano katakammassa ākaḍḍhanabhāvaṃ ñatvā na apagañchi. Thero tassa nissandena ākāse uppatituṃ nāsakkhi. Nandopanandadamanasamatthavejayantakampanasamatthāpissa iddhi kammabalena dubbalattaṃ pattā. Coro theraṃ gahetvā therassa aṭṭhīni taṇḍulakkhandhamattāni karonto bhinditvā saṃcuṇṇitvā palālapiṭṭhakakaraṇannāma katvā matoti saññāya ekasmiṃ gumbapiṭṭhe khipitvā saparivāro pakkāmi. Theropi satiṃ paṭilabhitvā satthāraṃ vanditvā parinibbāyissāmīti cintetvā sarīraṃ jhānaveṭhanena veṭhetvā thiraṃ katvā ākāsaṃ uppatitvā ākāsena satthu santikaṃ gantvā satthāraṃ vanditvā bhante āyusaṅkhāro me ossaṭṭho parinibbāyissāmīti āha. Parinibbāyissasi moggallānāti. Āma Bhanteti. Kattha gantvāti. Kāḷasilāpaṭṭe bhanteti. Tenahi moggallāna mayhaṃ dhammaṃ kathetvā yāhi tādisassa hi sāvakassa idāni dassanaṃ natthīti. So evaṃ karissāmi bhanteti satthāraṃ vanditvā tālappamāṇaṃ ākāse uppatitvā parinibbānadivase sārīputtatthero viya nānappakārā iddhiyo katvā dhammaṃ kathetvā satthāraṃ vanditvā kāḷasilāyaṃ aṭaviyaṃ parinibbāyi. Taṃ khaṇaññeva cha devalokā ekakolāhalā ahesuṃ amhākaṃ kira ācariyo parinibbutoti dibbagandhamālāvāsadhūpacandanacuṇṇe ceva nānādārūni ca gahetvā āgamiṃsu. Ekūnasatarattacandanacitakā ahosi. Satthā therassa santike ṭhatvā sarīranikkhepaṃ kāresi. Āhaḷanassa samantato yojanamatte padese pupphavassaṃ vassi. Devānaṃ antare manussā manussānamantare devā ahesuṃ. Yathānukkamena devānamantare yakkhā tiṭṭhanti. Yakkhānamantare gandhabbā tiṭṭhanti. Gandhabbānamantare nāgā tiṭṭhanti. Nāgānamantare venateyyā tiṭṭhanti. Venateyyānamantare kinnarā tiṭṭhanti. Kinnarānamantare kiṃpurisā tiṭṭhanti. Kiṃpurisānamantare chattā tiṭṭhanti. Chattānamantare suvaṇṇacāmarā tiṭṭhanti. Suvaṇṇacāmarānamantare dhajā tiṭṭhanti. Dhajānamantare paṭākā tiṭṭhanti. Satta divasāni sādhukīḷaṃ kīḷiṃsu. Satthā therassa dhātuṃ gāhāpetvā veḷuvanadvārakoṭṭhake cetiyaṃ kārāpesi.