Tadā dhammasabhāyaṃ kathaṃ samuṭṭhāpesuṃ āvuso sārīputtatthero tathāgatassa santike aparinibbutattā buddhānaṃ santike mahantaṃ Sammānaṃ na labhi mahāmoggallānatthero buddhānaṃ samīpe parinibbutattā mahāsammānaṃ labhatīti. Satthā āgantvā kāyanuttha bhikkhave etarahi kathāya sannisinnāti pucchitvā imāya nāmāti vutte na bhikkhave moggallāno idāneva mama santikā sammānaṃ labhi pubbepi labhiyevāti vatvā atītaṃ āhari.
Atīte bārāṇasiyaṃ brahmadatte rajjaṃ kārente bodhisatto purohitassa brāhmaṇiyā kucchismiṃ paṭisandhiṃ gaṇhitvā dasamāsaccayena paccūsasamaye mātukucchito nikkhami. Tasmiṃ khaṇe dvādasayojanike bārāṇasinagare sabbāvudhāni pajjaliṃsu. Purohito puttassa jātakkhaṇe bahi nikkhamitvā ākāsaṃ olokento nakkhattayogaṃ disvā iminā nakkhattena jātattā esa kumāro sakalajambūdīpe dhanuggahānaṃ aggo bhavissatīti ñatvā kālasseva rājakulaṃ gantvā rājānaṃ sukhasayitabhāvaṃ pucchi. Kuto ācariya sukhaṃ ajja sakalanivesane āvudhāni pajjalitānīti vutte mā bhāyi deva na tumhākaṃ nivesaneyeva sakalanagarepi pajjaliṃsuyeva ajja amhākaṃ gehe kumārassa jātattā evaṃ ahosīti. Ācariya evaṃ jātakumārassa pana kiṃ bhavissatīti. Na kiñci mahārāja so pana sakalajambūdīpe dhanuggahānaṃ aggo bhavissatīti. Sādhu ācariya tenahi naṃ paṭijaggitvā vayappattakāle amhākaṃ dadeyyāsīti vatvā khīramūlaṃ tāva sahassaṃ dāpesi. Purohito taṃ gahetvā nivesanaṃ gantvā brāhmaṇiyā datvā puttassa nāmagahaṇadivase jātakkhaṇe āvudhānaṃ pajjalitattā jotipālotissa Nāmaṃ akāsi. So mahantena parivārena vaḍḍhamāno soḷasavassakāle uttamarūpadharo ahosi. Athassa pitā sarīrasampattiṃ oloketvā sahassaṃ datvā tāta takkasilaṃ gantvā disāpāmokkhassa santike sippaṃ uggaṇhāhīti āha. So sādhūti sampaṭicchitvā ācariyabhāgaṃ gahetvā mātāpitaro vanditvā tattha gantvā sahassaṃ datvā sippaṃ paṭṭhapetvā sattāheneva nipphattiṃ pāpuṇi. Athassa ācariyo tussitvā attano santakaṃ khaggaratanaṃ sandhiyuttaṃ meṇḍakasiṅgadhanuṃ sandhiyuttaṃ tuṇḍisaraṃ attano sannāhakañcukaṃ uṇhīsañca datvā tāta jotipāla ahaṃ mahallako idāni tvaṃ ime māṇavake sikkhāpehīti pañcasate māṇavakepi tasseva niyyādesi. Bodhisatto sabbaṃ upakaraṇaṃ gahetvā ācariyaṃ vanditvā bārāṇasimeva āgantvā mātāpitaro passitvā aṭṭhāsi.