Atha naṃ vanditvā ṭhitaṃ pitā avoca uggahitante tāta sippanti. Āma tātāti. So tassa vacanaṃ sutvā rājakulaṃ gantvā putto me deva sippaṃ sikkhitvā āgato kiṃ karoti devāti āha. Ācariya amhe upaṭṭhahatūti. Paribbayamassa jānatha devāti. So devasikaṃ devasikaṃ sahassaṃ labhatūti. So sādhūti sampaṭicchitvā gehaṃ gantvā kumāraṃ pakkosāpetvā tāta tvaṃ rājānaṃ upaṭṭhahāti āha. So tato paṭṭhāya devasikaṃ devasikaṃ sahassaṃ labhitvā rājānaṃ upaṭṭhahi. Rājapādamūlikā ujjhāyiṃsu mayaṃ Jotipālena katakammaṃ na passāma devasikaṃ devasikaṃ sahassaṃ gaṇhati mayamassa sippaṃ passitukāmāti. Rājā tesaṃ vacanaṃ sutvā purohitassa kathesi. Purohito sādhu devāti sampaṭicchitvā puttassa ārocesi. So sādhu tāta ito sattame divase dassessāmi sippaṃ apica rājā attano vijite dhanuggahe sannipātāpetūti āha. Purohito taṃ sutvā gantvā rañño tamatthaṃ ārocesi. Nagare rājā bheriñcārāpetvā dhanuggahe sannipātāpesi. Saṭṭhisahassā dhanuggahā sannipatiṃsu. Rājā tesaṃ sannipatitabhāvaṃ ñatvā nagaravāsino jotipālassa sippaṃ passantūti bheriñcārāpetvā rājaṅgaṇaṃ sajjāpetvā mahājanaparivuto pallaṅkavare nisīditvā dhanuggahe pakkosāpetvā jotipālo āgacchatūti pesesi. So ācariyena dinnaṃ dhanutuṇḍisaraṃ sannāhakañcukaṃ uṇhīsañca nivāsanantare ṭhapetvā khaggaṃ gāhāpetvā pakativesena rañño santikaṃ gantvā ekamantaṃ aṭṭhāsi. Dhanuggahā jotipālo kira dhanusippaṃ dassetuṃ āgato dhanuṃ agahetvā pana āgato amhākaṃ hatthato dhanuṃ gahetukāmo bhavissati nāssa dassāmāti katikaṃ kariṃsu. Rājā jotipālaṃ āmantetvā sippaṃ dassehīti āha. So sāṇiṃ parikkhipāpetvā antosāṇiyaṃ ṭhito sāṭakaṃ apanetvā sannāhakañcukaṃ pavesetvā uṇhīsaṃ sīse paṭimuñcitvā meṇḍakasiṅgadhanumhi pabālavaṇṇaṃ jiyaṃ āropetvā tuṇḍisaraṃ piṭṭhe bandhitvā khaggaṃ vāmato katvā vajiraggaṃ nārācaṃ nakhapiṭṭhena parivattento sāṇiṃ vivaritvā paṭhaviṃ bhinditvā alaṅkatanāgakumāro viya nikkhamitvā Gantvā rañño apacitiṃ dassetvā aṭṭhāsi. Taṃ disvā mahājanā vagganti nadanti appoṭhenti. Rājā dassehi jotipāla sippanti āha. Deva tumhākaṃ dhanuggahesu akkhaṇavedhibālavedhisaddavedhisaravedhino cattāro dhanuggahe pakkosāpehīti. Rājā pakkosāpesi.