Tāmbapaṭṭaṃ ekaṅgulabahalaṃ ayapaṭṭaṃ ekābaddhaṃ phalakasataṃ vijjhi. Palālasakaṭavālukasakaṭapadarasakaṭānaṃ purimabhāgena saraṃ khipitvā pacchābhāgena nikkhamāpesi. Pacchābhāgena saraṃ khipitvā purimabhāgena nikkhamāpesi. Udake catuusabhaṃ thale aṭṭhausabhaṃ ṭhānaṃ kaṇḍaṃ pesesi. Vātiṅgaṇasaññāya usabhamatthake bālaṃ vijjhi. Tassa ettakāni sippāni dassentasseva suriyo atthaṅgato. Athassa rājā senāpatiṭṭhānaṃ paṭijānetvā jotipāla ajja vikālo sve senāpatiṭṭhānasakkāraṃ gaṇhissasi kesamassuṃ kāretvā nahātvā ehīti taṃ divasaṃ paribbayatthāya satasahassaṃ adāsi.

Mahāsatto mayhaṃ iminā attho natthīti aṭṭhārasakoṭisaṃkhyaṃ dhanaṃ sāmikānaṃyeva datvā mahantena parivārena nahāyituṃ gantvā kesamassuṃ kāretvā nahātvā sabbālaṅkārapaṭimaṇḍito anopamāya siriyā pavesanaṃ pavisitvā nānaggarasabhojanaṃ bhuñjitvā sirisayanaṃ abhiruhitvā nipanno dve yāme sayitvā pacchimayāme pabuddho uṭṭhāya pallaṅkaṃ ābhujitvā sayanapiṭṭhe nisinnova attano sippassa ādimajjhapariyosānaṃ olokento mama sippassa āditova paramāraṇaṃ paññāyati majjhe kilesaparibhogo pariyosāne nirayamhi paṭisandhi pāṇātipāto hi kilesaparibhogesu ca adhimattappamādo niraye paṭisandhiṃ deti raññā mayhaṃ mahantaṃ senāpatiṭṭhānaṃ dinnaṃ mahantaṃ me issariyaṃ bhavissati bhariyā ca puttadhītaro ca bahū bhavissanti kilesavatthu kho pana vepullaṃ gataṃ duccajaṃ hoti idāneva nikkhamitvā Ekakova araññaṃ pavisitvā isipabbajjaṃ pabbajituṃ yuttaṃ mayhanti mahāsayanato vuṭṭhāya kiñci ajānāpento pāsādā oruyha aggadvārena nikkhamitvā ekakova araññaṃ pavisitvā godhāvarīnadītīre tiyojanikaṃ kapiṭṭhavanaṃ sandhāya pāyāsi. Tassa nikkhantabhāvaṃ ñatvā sakko vissakammaṃ pakkosāpetvā tāta jotipālo abhinikkhamanaṃ nikkhanto mahāsamāgamo bhavissati godhāvarīnadītīre kapiṭṭhavane assamaṃ māpetvā pabbajitaparikkhāre ca paṭiyādehīti āha. So tathā akāsi.