Mahāsatto taṃ ṭhānaṃ patvā ekapadikamaggaṃ disvā pabbajitānaṃ vasanaṭṭhānena bhavitabbanti tena maggena tattha gantvā kiñci apassanto paṇṇasālaṃ pavisitvā pabbajitaparikkhāre disvā sakko devarājā mama nikkhantabhāvaṃ aññāsi maññeti cintetvā sāṭake apanetvā rattavākacīraṃ nivāsetvā ca pārupetvā ca ajinacammaṃ ekaṃsaṃ akāsi jaṭāmaṇḍalaṃ bandhitvā khārikājaṃ aṃse katvā kattaradaṇḍaṃ gahetvā paṇṇasālato nikkhamitvā caṅkamaṃ āruyha katipayavāre aparāparaṃ caṅkamitvā pabbajjāsiriyā upasobhayamāno kasiṇaparikammaṃ katvā pabbajitakālato paṭṭhāya sattame divase aṭṭhasamāpattiyo pañcābhiññāyo nibbattetvā uñchācariyāya vanamūlaphalāhāro ekakova vihāsi. Mātāpitaro mittasuhajjādayo ñātivaggāpissa taṃ apassantā rodantā paridevantā vicaranti.

Atheko vanacarako araññaṃ pavisitvā kapiṭṭhaassamapade nisinnaṃ Mahāsattaṃ disvā taṃ sañjānitvā tena saddhiṃ paṭisanthāraṃ katvā nagaraṃ gantvā tassa mātāpitūnaṃ ārocesi. Te rañño ārocesuṃ. Rājā etha taṃ passissāmāti tassa mātāpitaro gahetvā mahājanaparivuto vanacarakena desitena maggena godhāvarīnadītīraṃ pāpuṇi. Bodhisatto nadītīraṃ āgantvā ākāse nisinno dhammaṃ desetvā te sabbe assamaṃ pavesetvā tatrāpi tesaṃ ākāse nisinnova kāmesu ādīnavaṃ pakāsetvā dhammaṃ desesi. Rājānaṃ ādiṃ katvā sabbeva pabbajiṃsu. Bodhisatto isigaṇaparivuto tattheva vasi. Athassa tattha vasitabhāvo sakalajambūdīpe pākaṭo ahosi. Aññe rājāno raṭṭhavāsīhi saddhiṃ āgantvā tassa santike pabbajiṃsu. Samāgamo mahā ahosi. Anupubbena anekasatasahassaparisā ahosi. Yo kāmavitakkaṃ vā byāpādavitakkaṃ vā vihiṃsāvitakkaṃ vā vitakketi mahāsatto tattha gantvā tassa purato ākāse nisīditvā dhammaṃ desesi kasiṇaparikammaṃ ācikkhi. Tassovāde ṭhatvā aṭṭhasamāpattiyo uppādetvā jhānanipphattiṃ pattā. Sālissaro meṇḍissaro pabbato kāladevalo kīsavaccho anusisso nāradoti satta jeṭṭhantevāsino ahesuṃ. Aparabhāge kapiṭṭhaassamo paripūri. Isigaṇassa vasanokāso nappahoti.