Athassa aparabhāge paccanto kuppito. So senāṅgaparivuto yuddhāya nikkhami. Atha naṃ mohamuḷho purohito mahārāja kiṃ tumhe jayaṃ icchatha udāhu parājayanti pucchitvā jayanti vutte tenahi rājuyyāne kāḷakaṇṇī vasati tassa sarīre kaliṃ pavāhetvā yāhīti. So tassa kathaṃ gahetvā ye mayā saddhiṃ gacchantā uyyāne kāḷakaṇṇisarīre kalī pavāhentūti vatvā uyyānaṃ pavisitvā dantakaṭṭhaṃ khāditvā sabbapaṭhamaṃ sayameva tassa jaṭantare kheḷañca dantakaṭṭhañca khipitvā sīsaṃ nahāyi. Balakāyopi tassa tathā akāsi. Tasmiṃ pakkante senāpati āgantvā tāpasaṃ disvā dantakaṭṭhādīni haritvā sādhukaṃ nahāpetvā bhante rañño kiṃ bhavissatīti pucchi. Āvuso mayhaṃ manopadoso natthi devatā pana kuppitā ito sattame divase sakalaraṭṭhaṃ araṭṭhakaṃ karissati tvaṃ sīghaṃ palāyitvā aññattha gacchāhīti. So bhītatasito gantvā Rañño ārocesi. Rājā tassa vacanaṃ sutvā na gaṇhi. So nivattitvā attano gehaṃ gantvā puttadāraṃ ādāya palāyitvā aññaṃ raṭṭhaṃ agamāsi. Sarabhaṅgasatthā taṃ kāraṇaṃ ñatvā dve taruṇatāpase pesetvā kīsavacchaṃ mañcasivikāya ākāsena ānāpesi. Rājā yujjhitvā core gahetvā nagarameva paccāgami. Tasmiṃ āgate devatā paṭhamaṃ devaṃ vassāpayiṃsu. Vassoghena sabbakuṇapesu avaharantesu suddhabālukāvassaṃ vassi. Vālukāmatthake dibbapupphavassaṃ vassi. Pupphamatthake māsakavassaṃ vassi. Māsakamatthake kahāpaṇavassaṃ vassi. Kahāpaṇamatthake dibbābharaṇavassaṃ vassi. Manussā somanassappattā hiraññasuvaṇṇābharaṇāni gaṇhituṃ ārabhiṃsu. Atha nesaṃ sarīre sampajjalitaṃ nānappakāraṃ āvudhavassaṃ vassi. Manussā khaṇḍākhaṇḍikaṃ chijjiṃsu. Atha nesaṃ upari mahantamahantāni vītacchitaṅgārāni patiṃsu. Tesaṃ upari mahantamahantāni pajjalitapabbatakūṭāni patiṃsu. Tesaṃ upari saṭṭhihatthaṭṭhānaṃ pūrayantaṃ sukhumavālukāvassaṃ vassi. Evaṃ saṭṭhiyojanaṭṭhānaṃ araṭṭhaṃ ahosi. Tassa evaṃ vinaṭṭhabhāvo sakalajambūdīpe pākaṭo ahosi.